Rajya Sabha MP in Union Home Minister a kawm

Mizoram Rajya Sabha MP K. Vanlalvena chuan Inrinni khan Union Home Minister Amit Shah chu New Delhi-a a chenna In-ah hmuin Mizoram thil pawimawh thenkhat a sawipui.

He an inkawmna ah hian Rajya Sabha MP chuan thenawm ram Myanmar politics inthlak mek chungchang sawiin, ‘Act East Policy’ kalpui mek hnuaia Mizoram chhimlam in tuifinriat a pawhna tur kawngpui sial mek KMMTTP tihpuitlinna tur leh Indo-Myanmar Border Trade Centre, Zokhawthar awmze nei zawka a kal theih nan venhimna thilah thil pawimawh sawrkar laipuiin a tih thar ngai nia a hriat te a sawipui a. Aizawl khawpui laili atanga Assam Rifles te Zokhawsang-a insawn tur chungchang pawh sawipuiin, he ruahmanna lo intanna chu kum 1988-a Assam Rifles-te leh mipuite inhmuhthiam lohnaah Assam Rifles ten mipui pawisawi lo mi 11 lai an kahhlum avang leh mi tam takin hliam an tawrh avangin khawpui laili atanga Assam Rifles te sawnchhuah chu Civil mite nena intihbuaina a awm fo lohna tura tih makmawh nia hriaa kha tih laia Chief Minister Laldenga ruahmanna a nih thu a hrilhfiah bawk a. Kum 36 ral hnuah an la chhuak lo fo leh nikum-a amah, Amit Shah ngei Aizawl-ah lo kala a rawn enfiah tawh hnuah an la insawn lo fo chu mipui ten an hriatthiam loh thu a sawi lang bawk a ni.

Hei bakah hian Mizoram Chief Secretary ni lai Renu Sharma chu kumin October thla tawpa pension tawh tur a nih avangin Mizo hnahthlak zing ami, Mizo tawng thiam IAS Senior Mizoram Chief Secretary-ah rawn dah a tul thu a sawipui bawk a ni.