Chief Minister in Taiwan Company te Mizoram a rawn lut turin a sawm

Chief Minister Lalduhoma chuan Taiwan Company te chu Mizoram a rawn luta kan ram-a theihna leh remchang awm te rawn dai dar turin a sawm a. Mizoram University leh Taiwan ram University pahnih ten MoU an ziak chu tha a tih thu a sawi bawk.

New Delhi-a cham mek Chief Minister Lalduhoma hian nimin khan Bharat Mandapam, Pragati Maidan, New Delhi-a ‘Taiwan Expo, 2024 India’ hawnna hun chu khuallian niin a hmanpui a, Taiwan External Trade Development Council, India bultuma ‘Taiwan Expo, 2024 India’ an hian Chief Minister chuan Taiwan ram chuan Technology Innovation lamah entawntlak takin hma a sawn tih sawiin, Culture ropui leh hmasawn zelna tur remchang tam tak a neih thu a sawi a. Mizoram chu Taiwan nena thuk zawka inpawh turin an inpeih tih sawiin, “India hmarchhak ram, South East Asia ram dang te nena awlsam taka inkalpawh theihna, sawrkar laipuiin Act East Policy a kalpui mekna hmun pawimawh tak kan ni,” a ti a. Hei bakah hian Taiwan leh Mizoram chu Tropic of Cancer paltlang ram ve ve, sik leh sa, ei leh in leh kawng tam taka nunphung inang tak nei kan nih thu sawiin, Taiwan Company te chu Mizorama rawn luta kan rama theihna leh remchang awm te rawn dai dar turin a sawm a. “Ka kaihhruai sawrkar hian Infrastructure lamah leh sumdawnna lamah nasa zawka hmasawn tumin kan bei mek a, in tan kan inhawng a ni,” a ti.

India Taiwan Labour Mobility Agreement buaipui mek chu Mizo thalai tam tak ten an chhawr tangkai a beisei tlat thu Chief Minister chuan sawiin, Mizoram University leh Taiwan ram University pahnih ten MoU an ziak chu tha a tih thu a sawi a, tunah ngei pawh Taiwan ramah Mizo aiawh pawl pahnih an zin mek thu pawh sawiin, Mizo thalaite Skill Development lama kaihruai turin Taiwan Technology Company leh University te chu a sawm bawk a ni. Taiwan Expo, 2024 India-ah hian Taiwan Company 120 chuang an tel a ni.

Taiwan Expo, 2024 India-ah hian Chief Minister Lalduhoma hian Foxconn India aiawh V. Lee chu a kawm nghal bawk a, Foxconn Company-a Mizo thalaiten hna an thawh ve theih dan tur leh Foxconn lamin Mizoram-a thilsiamna an kalpui ve theih dan zirchian chungchang te an sawi dun bawk a ni.