Council of Minister thukhawm in sawrkar hnathawk aikal lak phal lohna khauh taka kenkawh an rel

Mizoram sawrkar-a Council of Minister chu nimin khan Chief Minister Lalduhoma hovin an thukhawm a, thu pawimawh hrang hrang an ngaihtuah zingah sawrkar hnathawk Aikal lak phal lohna chu khauh taka kenkawh relin Myanmar nena inrina hung chungchang leh ramri-a inkalpawhna Free Movement Regime chungchang pawh sawiho a ni.

Mizoram sawrkar-a Council of Minister thutkhawm hi nimin khan Chief Minister Office Cabinet Meeting Room-ah Chief Minister Lalduhoma hova neih niin sawrkar Department hrang hrang atanga thu ngaihtuah tura chhawpchhuah 20 ngaihtuah a ni a, ZPM in thuneihna an chan hlima Chief Minister in ni 100 chhunga tih hlawhtlin tur a puan zinga mi, sawrkar hnathawk aikal lak chu a reh theih nan khauh taka kenkawh an rel a, Assembly Rorel Inkhawm in Police leh Home Guard te Rifles Allowance thla khata Rs. 40/- ni thin Rs. 80/- a tihpun a lo remtih tawh chu Rs. 100/- ah zawk tihpun nise an ti a. CSS hnuaia hnathawk Mizoram sawrkar-a Contract-a kum 15 chuang lo thawk tawh leh Provisional Employee kum 20 chuang lo thawk tawh te dahngheh chungchang ah heng hnathawk te dinhmun hi uluk taka en chhoh mek a nih thu leh a tul anga ruahmanna siam nise an ti bawk. Heng bakah hian sawrkar laipui in India leh Myanmar ramri hung a tumna chu sawrkar laipui in a taka a kaltlangpui theih a rinawm loh thu leh he ruahmanna hi Mizoram sawrkar chuan tha a tih loh thu an sawi a. Sawrkar laipui in raltlan te chhinchhiahna tura Biometric and Biographic dat la tura a tihna pawh sawrkar laipui rilru thlir chunga a tul anga hmalak nise an ti bawk.

Council of Minister hian The Mizoram Ceiling on Government Guarantees Act, 2011 siamthaa a thara thlakna tur The Mizoram Ceiling on Government Guarantees (Amendment) Bill, 2024 chu a taka hman remti in Guarantor-a sawrkar a tan theihlohna pawh hlih a ni a, heng bakah hian Contractor nih theihna dan ennawn rawtna te, PSU hnuaia Board hrang hrang- ZIDCO, MIFCO, ZOHANDCO, Mizoram KVI Board Chairman bakah Mizoram Youth Commission Chairman te dinhmun, lawmman leh hamthatna dang an neih ennawn rawtna te, Sawrkar hmalakna a ruang phur tur inkaihhruaina Dan te, Scheduled Tribes & Other Traditional Forest Dwellers (Recognition of Forest Rights) Act, 2006 leh Draft Mizoram Electric Vehicle Policy, 2024 bakah sawrkar thil pawimawh hrang hrangte ngaihtuah a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man