Taxi Permit pek STA in a ngaihtuah dawn

Transport Minister Vanlalhlana’n Two Wheeler Taxi Permit pek chungchang chu State Transport Authority (STA) in a ngaihtuah dawn tih a sawi.

Assembly thutkhawm neih zawh taka zawhna leh chhanna hunah Transport Minister chuan Aizawl leh hmun dangah Two Wheeler Taxi Permit pek belh a ngaih leh ngaihloh chu STA in ngun takin a ngaihtuah dawn tih a sawi a. District thar pathum ah DTO Office nei turin hmalakna a awm tih sawiin, tun dinhmunah an hawn theih lohna chhan chu Staff indaihlohna vang a nih thu leh Staff lak belhna tur Finance leh DP&AR in phalsakin District thar 3 - Khawzawl, Hnahthial leh Saitual atan Motor Vehicle Inspector 3, LDC 3, Enforcement Sub-Inspector 6, Group D Staff 3 lak remtih a ni tawh tih a sawi.

Transport Minister chuan Mizoram-ah Weighbridge pakhat, Vairengte-ah a awm mek tih sawiin, sawrkarin Weighbridge dang, Champhai, Kanhmun leh Phunchawng-ah bun turin hma a la mek tih a sawi a, Green Hills Infrastructure Mission Veng chu a buaipuitute an ni tih a sawi bawk.