Samagra Shiksha leh Central YMA ten Thawhhona tur thuthlung an ziak

Samagra Shiksha leh Central YMA te chuan nimin khan thawhdunna thuthlung an ziak a, he hun hi School Education Minister Dr. Vanlalthlana chuan a hmanpui a ni.

Samagra Shiksha leh Central YMA thawhhona thuthlungah hian Samagra Shiksha aiawhin State Project Director Lalhmachhuana leh Central YMA President Lalhmachhuana ten hming an ziak a, YMA General Secretary Prof. Malsawmliana leh Samagra Shiksha-a Additional State Project Director H. Lalhruaitluanga ten hriatpuina an ziak bawk a, he thawhhona thuthlung ah hian naupang School kal lo dapchhuah te, naupang rualbanlo zirna kawnga thawhhona tur te, Central YMA, Group leh Branch hrang hrangah School kaichhan (Vidyanjali) kawnga hmalak te, zirlaiten ngaihsan leh hnualsuat tur an hriat theihna tura rilru dik an put theih nana thawhho te a tel a ni.

School Education Complex Conference Hall, Mac Donald Hill Aizawl-a thawhhona thuthlung an ziahna hunah hian Education Minister Dr. Vanlalthlana chuan Mizoram zirna tih hmasawnna tur kawng hrang hrangin thawh a ni dawn tih sawiin, School-a Zirlaite chhiar atan Comics siam tum a nih thu leh Comics-ah hian Mizo tlawmngaihna leh Mizo thil pawimawh chi hrang hrang bilhluh a ni dawn tih a sawi a, hei hi Zirlai naupangten Mizo thil an hriat phah theih dawn a, hetiang hi kum kalta lamah a bial chhungah hlawhtling takin a lo kalpui tawh tih a sawi bawk. Education Minister chuan MLA ten an bial chhung tihhmasawn nan kum nga (5) chhungin nuai sangkhat an nei thei tawh dawn tih pawh sawiin, thil tangkai tak tak thawh nan a hman theih dawn thu a sawi a, zirna atana hman theih dan kawng dap a pawimawh tih a sawi a. School-a thawk Zirtirtute attendance lakna atan KAI tih App chu siam a nih thu pawh sawiin, he hmanrua atang hian zirtirtu kal that leh that loh chu awlsam takin en zung zung theih a ni dawn tih a sawi a. Zirna chu ram leh hnam humhalh nan a pawimawh tih sawiin, Mizoram hi thlah kal zelte tan chenna tlaka chhawpchhuah tum a, penho zel turin he huna tel te chu a sawm a. YMA te nen pawh thawhhona tha tak an neih theih zel a beisei thu a sawi bawk.

Thawhhona thuthlung ziahna hunah hian Central YMA President Lalhmachhuana chuan YMA-in Quality Education a buaipui mek tih sawiin, “Zirlaiten zirna tha hi an phu a, tun dinhmunah chuan zirnaah khawpui leh thingtlang a la inthlau viau a, hei hi ngaihtuah a ngai hle a ni,” a ti a. Sumdawnna atana zirna kalpui an tam ta chu an ngaihmawh thu leh khawng zawka kal an duh thu sawiin, zirlai naupangte lehkha chhiar tur lakkhawm dan turah ngaihtuahna an sen mek thu a sawi bawk.