Champhai District kum 25 tlin lawmna CM in a hmanpui

Chief Minister Lalduhoma chuan nimin khan Champhai District Silver Jubilee lawmna DC Office Complex, Keifangtlang-a buatsaih hmanpuiin thangthar tha zawk din tura tih makmawh hmasa chu zirna tha neih a nih thu leh a ti hlawhtling turin sawrkarin ruahmanna a duan mek thu a sawi.

Champhai District kum 25 tlin lawmna ah hian Chief Minister Lalduhoma chuan mipuite chibai bukin, Champhai District tana hmasawnna hna-thawh tura ruahmanna awm te a sawi a. Kawng hrang hranga Champhai District pawimawhna te sawiin, District tana sum dah hrang hrangte a sawi bawk. Chief Minister chuan raltlante lo tuamhlawm chu an tihtur a nih thu leh thlamuang takin a tul chen chen Mizoram-ah an awm theih tur thu a sawi a. Mizoram, ram ralmuang a nihna chu nghet taka vawnhim zel an tum tlat thu sawiin, tunhnaia sawrkar laipuiin ramri hung an tumna pawh an pawm theih loh thu leh Free Movement Regime thlenga pawm a harsat thu Prime Minister Narendra Modi bakah sawrkar laipui hotu dangte pawh a sawipui tawh thu a sawi. 

Lalduhoma chuan Champhai leh Hnahlan a Grape chingtute leh Wine siamtu chhungkaw tam takte eizawnna a chu sawrkar chuan a thlah-thlam dawn lo tih a sawi a, Indo-Myanmar Border Trade mumal taka kalpui tura hmalak an tum thute, ruihhlo dona kawnga hmathar lak an tum dan te a sawi a. A kaihhruai sawrkarin Hand Holding Policy kalpui nan budget ah cheng vbc. 200 an dah thu leh he policy kalphung turte a sawi bawk.

Champhai District hi December ni 12, 1997-ah puan a ni a, sawrkar hriattirna hi March ni 11, 1998-ah chhuakin, hemi kum vek April thla ah a lawmna neih a ni a. Nimin-a an kum 25 tlin lawmna hun hi Champhai DC James Lalrin-chhana chuan a kaihruai a ni.