Tawi bialtu MLA in Saitual-a Office hotute a kawm

Nimin khan Tawi Bialtu MLA leh Minister Prof. Lalnilawma chuan Saitual tlawhin Saitual a Head of Office hrang hrangte a kawm.

Saitual DC Conference Hall-a he hun hman ah hian bialtu MLA chuan Department hotuten an mamawh hrang hrang an sawi te ngaithlain, an mamawh te chu pawimawh tak tak ni mahse tun dinhmun ah, Year of Consolidation a nih ang takin a vaia tih hlawhtlin nghal rum rum a remchan loh avangin a tahtawl te te a lo bawhzui a tum thu a sawi a. Saitual DC Dr. Lalngura Tlau hmalakna hnuaiah JNV te pawh tha taka a function thei ta chu lawmawm a tih thu a sawi bawk.

Bialtu MLA chuan Saitual District-a a ngaih pawimawh zual te pawh sawiin, Saitual Town Master Plan bawhzui chu a ngai pawimawh hle tih sawiin, Department thenkhat, Saitual tan a pawimawh tak tak tur, District Transport Office te, Revenue Office te leh BDO Office te chu Saitual in a mamawh thu a sawi a, heng Department te leh Department dang te pawh Saitual in an neih theih nan theihtawp a chhuah tur thu a sawi bawk. Hemi hnu hian bialtu MLA hnenah hian VC leh NGO ten an mamawh te an lo thlen ve bawk a ni.