NGOCC-in Union Home Minister hnenah an thlen

NGO Coordination Committee (NGOCC) Mizoram chuan Union Home Minister hnenah Mizoram leh Myanmar ramri-a Border Fencing siam tum leh Free Movement Regime (FMR) tihtawp tum chu ngaihtuah tha leh tura ngenna email hmangin an thawn.

Central YMA, MUP, MHIP, MZP leh MSU te telna NGO Coordination Committee chuan India sawrkarin India leh Myanmar ramri hung a tum chungchang leh Free Movement Regime (FMR) thiah a tum chungchang ngaihtuah nawn leh tura ngenna he an lehkha thehluh ah hian an tarlang a. Hei bakah hian UN Declaration on the Rights of Indigenous People thuthlung a ziaktu a nih ve angin India ram chuan heng ramri in a tihhran hnam te chungchangah hian ngaihtuahna ngun taka a sen an beisei thu an sawi a. FMR thiah tum chu ram thenawma chengte nena inunauna leh inpumkhatna tichhe thei a nih thu an tarlang a ni.

NGOCC chuan ramri hung leh FMR thiah tumna chu Mizo hnam thendarh tumnaah an ngaih thu sawiin, hei vang hian FMR chu dan hnuaia siam a nih anga tuna mi anga kalpui zel ni se an duh thu an sawi a. Ramri hung leh FMR thiah chuan ram pahniha chengte tan nasa taka harsatna a siam dawn avang leh inpumkhatna khawih chhe thei a nih avangin an hmalak tumna chu ngaihtuah nawn leh se an duh thu an lehkhathawnah hian an tarlang a ni. Lehkha hi nizan hmasa khan email kaltlanga thawn niin nimin khan Larsap Pisa-ah an thehlut bawk a ni.