Aizawl New Market building sak mek Minister in tlawh

Commerce & Industries Minister F. Rodingliana chuan nimin zing khan Aizawl New Market building thar sak mek chu tlawhin hnathawh a enfiah.

Aizawl New Market-ah hian building pahnih – Smart City Mission hnuaia ‘City Centre’ leh Commerce & Industries Department hnuaia sak City Centre Annexe te sak mek a ni a. City Centre Project hi cheng nuai 4035 man niin he hmunah hian dawr 1105 awm tura ruahman a ni a, Lirthei Four Wheeler 31 leh Two Wheeler 79 dah theih tura ruahman a ni a. Cold Storage, CCTV, Service Lift leh Office te awm tura ruahman a ni a. Ground Floor leh Basement bakah Floor 7 awm tura ruahman a ni. City Centre Annexe building sak mek hi cheng nuai 3641.59 man a ni a, dawr 135 awmin, Hawkers 183 thu thei tura ruahman a ni a. Two Wheeler 219 leh Four Wheeler 69 dahna bakah Staff Quarters engemaw zat sak tur a ni bawk.

Commerce & Industries Minister chuan he bazar building sak mek hi mipuite nghawng tak tak thil anih avangin a ngaih pawimawh thu leh chak zawka hnathawh a tul thu a sawi a. Hnathawh mekte uluk taka vil tur leh quality control uluk turin a enkawltu Department te a chah a, Contractor te pawh chak zawka hnathawk tur leh harsatna an neihte chu a tul anga hmalak ho zel turin a ti a. Bazar Seat leh Stall changtu ten midang hnenah an hralhchhawng thin ni a sawi awm chu a ngaih pawimawh thu sawiin, Commerce & Industries Department thuneitute chu lo enfiah turin a chah a, thil ti diklo an awm chuan Allotment Cancel sak thlenga hma la turin a hrilh bakah hetiang ti thin hria chuan Department thuneitute hnena report turin mipuite chu a ngen bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man