Minister hovin World Blood Donor Day hmang

Nimin khan World Blood Donor Day chu Health Minister Dr. R. Lalthangliana hovin Aizawl Dawrpui Multipurpose Hall-ah hman a ni. World Blood Donor Day puala hun hman ah hian Health Minister chuan thisen pe thinte chu chawimawi an phu tih sawiin, kumin hian thupui atan ‘Give Blood, give plasma, share life, share often’ tih chuan a mamawhte hnena thisen pek uar leh mihring nun chhan nana thisen hlutna a keng tel tih a sawi a, thisen pek pawimawhna leh mi hrisel pangngai tan a hlauhawm lo tih thalai ten an hriat zau zelna turin he hun hmangtu zirlai kalkhawmte chu midangte tihhmuhtu a tang turin a chah bawk. Kum 2022 April atanga kumin March thla inkar khan Mizoram pumah thisen Unit 37,419 pek a ni a, mahni duhthu ngeia thisen pek (Voluntary Blood Donation) Unit 34,252 niin mimal inpe ten Unit 10,744 an pe bawk a ni.