LENKAWL ADS (Computer zir duh tan 6) :

Nimin-a Mizoram Legislative Assembly thutkhawm ah Home Minister Lalchamliana Official Resolution putluh, ‘India ram puma hman tura Uniform Civil Code Dan siam tumna awm apiang chu he House hian lungrual takin a do zel ang,’ tih chu lungrual taka pass a ni.

Nimin-a Assembly thutkhawm chhunzawm ah Zawhna leh chhanna hun hman zawh a nih hnuah Home Minister Lalchamliana hian, Sawrkar laipuiin India ram puma chengte tan tihdanphung pakhat inhmantawmna tur, Unioform Civil Code kalpui a tum ni-a sawi duh loh lantirna Official Resolution hi a pulut a. Resolution a putluh rual hian Home Minister chuan, India-a cheng Hnam hrang hrang leh Sakhaw hrang hrang ten mahnni puala Dan leh kalphung an neih angin Inneih leh Inthenna dan te, Rokhawm dan leh Thurochhiah te, Chhungkaw inekawlna dan te, Ram neih dan phung te, Personal Law leh Customary law te an nei hlawm a, heng Hnam leh Sakhaw tihdan phung hrang te hi dahbo-a dan pakhat inangtlang, Unioform Civil Code rampuma hman tur siam chu Uniform Civil Code thil tum ber a ni tih a sawi a. He dan hian Hnam leh Sakhaw pawh thliar lo a, inhrutrual vek chu a tum a nih avangin hman lo ni ta se Hnam leh Sakhaw hrang hrangte himna a nghawng ngei dawn a, an Hnam leh Sakhaw nun an vawn nun ve reng thin pawh a bo dawn niin a sawi a ni. 

Home Minister Lalchamliana chuan, UCC hi thil thar a ni lo tih pawh sawiin, India a indan dawna ram Danpui siamtu Constituent Assembly-ah pawh UCC hi nsasa takin chai a nih thu leh a thenin siam ngei an duh laiin, a thenin inpumkhatna tichhe thei a nih an hlauh ve thung avangin ram danpui Directive Principle of State Policy (DPSP) zinga pakhat ni turin Article 44-naah ziahlan a ni ta tih a sawi. 

He dan tha lo tak, Uniform Civil Code hi lo siam ta pawh nise, Mizoram-a chengte chu MNF leh India Sawrkar-in inremna thuthlung an ziah ah, Mizoram leh Hnam himna atana duan Special Provision Artilce 371(G) in a humhim tlat tih Home Minister chuan a sawi a, UCC chu Mizoram leh Mizo hnam tan a hlauh-awm lo tih hre mah se, India pumpui ngaihtuahin a tha lo tih chu an ngaihdan a nih thu a sawi a. Article 371(G) Special Provison with respct to the State of Mizoram-ah chuan Mizoram State Legislative Assembly-in a pawmpui loh chuan Mizo Sakhuana te, tihdan phung te, Mizo Customary leh tihphung te, Mizote tihdanphung kaihhnawiha Civil leh Criminal Justice bakah neitu nihna leh ram inhlan-chhawn leh rochun dante chu Parliament-in a tidanglam nagwt thei lo tih a sawi a. Hetihrual hian UCC hi hman lo ni ta se State danga cheng Mizote a nghawng dawn thung ni-a a lan avang te, India inpumkhatna atan pawh nghawng tha lo nei thei a ni a, a bikin Hnam tenau leh Sakhaw zuitu tlemte tan a that loh avangin an dodal tlat tih Home Minister chuan a sawi a ni.

He Resolution sawihona-ah hian ror-ellai Member C. Lalmuanpuia’n a sawi hmasa ber a, BJP Member awmchhun Dr. BD. Chakma chuan sawi lehin Congress Legislature Party hruaitu Zodintluanga Ralte leh ZPM Legislature Party hruaitu Lalduhoma te’n an sawi leh a. Hemi hnu hian House Leader Zoramthanga pawhin India ram chu leilung leh sik leh sa pawh inang lo tak tak, Hnam chi hrang hrang inang lo tak tak leh hnam nunphung leh Sakhaw hrang hrang biate chenna a nih avangin Uniform Civil Code hi India ramah hman chi a ni lo tih a sawi a. Hemi hnu hian Resolution puluttu Home Minister Lalchamliana’n pawm a dil angin House chuan lungrual takin a pawm ta a ni.