Kumin chhungin Dengue vei 294 hmuh ni tawhin Dengue laka him nan Thosi laka inven tul ti

Kumin (2022) January atanga September thla tawp thleng khan Mizoram-ah Dengue vei mi 294 hmuh an ni tawh a. Tunhnaia Dengue vei an tam nia a lan chhan chu Rapid Test-a hmuhchhuah a tam vang nia an hriat thu Health Department-a thawktute chuan an sawi.

Health Department-a Joint Director (Malaria) Dr. Hmingthanmawii chuan Mizoram-a Dengue vei te hi a tlangpuiin Aizawl leh a chhehvela mite an ni tih sawiin, Lunglei leh Kolasib District-ah pawh tlem hmuh an ni ve niin a sawi a, Aizawl-ah erawh a hluar deuh niin a sawi a, Dengue chu Malaria angin a enkawlna damdawi a awm ve lo tih sawiin, a natna lanchhuah ang anga enkawl mai thin a ni tih a sawi. Dr. Hmingthanmawii chuan Dengue natna finfiah (confirm) tur chuan Elisa Test chauh an pawm tih sawiin, tunhnaia Dengue nia an hmuhchhuah tam tak chu a ni lo thei tih a sawi bawk a, “Keini chuan Elisa khawl atanga hmuhchhuah chauh hi kan pawm a, Rapid Test-a hmuh tam tak, Dengue-a inngai hi an ni vek lo a. Vei an tam anga a lan lai hian kan tam lo niin kan hria a. Elisa test hi Aizawl leh Lunglei Civil Hospital bakah Genesis Laboratory-ah te a awm a ni,” a ti. Dengue natna chu ziaawm ve leh mai turah an ngai tih sawi bawkin, “Kumtin August atanga November hi he natna hluar hun lai a ni a, a bikin October thla hi a vanglai a ni a. December-ah chuan a ziaawm leh kan beisei a ni,” tiin Dengue vanga thi report an la dawn loh thu a sawi bawk.

Kum 2016 khan Mizoram-ah Sample 1423 enfiah niin Dengue vei mi 580 hmuh an ni a, kum 2017-ah mi 136 hmu lehin kum 2018-ah mi 68 hmuh leh an ni bawk a. Kum 2019-ah mi 131 ten veiin kum 2020-ah mi 67 in an vei leh a, nikum 2021 khan mi 83 ten vei lehin kumin hian Dengue vei mi 294 lai hmuh an ni leh tawh a ni.

Dengue laka inven nan Thosi tui theihna ang chi tihbo vek leh Thosi seh lo tura tan lak a tul tih Dr. Hmingthanmawii chuan sawiin, “Dengue natna pu darhtu Thosi te hi tial thik thek an ni a, zing leh tlai ni tlak hma hian mi an seh duh bik a. Chuvangin, min seh lo turin thosi hlauh chi hal te, inchulh bakah kawr leh kekawr tluan inbel te a pawimawh,” a ti bawk.