Sawrkar in zirna tihchangtlun zel a tum - CM

Chief Minister Zoramthanga'n sawrkarin zirna ngai pawimawhin tihchangtlun zel a tum tih a sawi a, thalaite chu zirna kawnga theihtawp an chhuah laiin an nun hloh lova inthunun tlat turin a chah.

Aizawl Thuampui Veng-a Aizawl North High School building hawnna leh HSLC pass lawmna Thuampui YMA Hall-a Zirtawpni-a buatsaih a hmanpuina ah he thu hi sawiin Chief Minister chuan tunlaiah chhungkua leh khawtlanga hlim lohna, buaina, khawsak harsatna leh buaina thlentu langsar tak chu zu leh ruihhlo a nih thu a sawi a, thalaite chu ruihhlo laka fihlim tlat tura a chah bakah heng thilte hi Siamtu in mihring nih dan tur a duan ang ni pha lova mi dahtu a ni, a ti bawk.

He hunah hian School Education Minister Lalchhandama Ralte pawhin hripui leng vanga School mumal taka a kal theih loh karah Mizoram Board of School Education (MBSE) in Board exam hlawhtling taka a kalpui thei chu thil ropui tak leh State dangte lakah pawh chhuan tham a nih thu sawiin, mipui leh sawrkar thawhhona zar a ni, a ti a. Ram hmasawnna atan Education chu lungthu pawimawh tak a nih avangin zirna lamah theihtawpa sawrkarin hma a lak zel tur thu a sawi a. Zirna peng hrang hranga hmasawnna bakah hnam ziarang hriatchianna leh mahni nihnaa nghet tlata awm a pawimawh thu a sawi bawk a; chumi atan chuan Elementary Level-a subject thar 'Zonun' chu dah a nih thu a sawi bawk.