Assembly House hi tullo leh awmze nei lova inhnialbuaina hmun tur a ni lo - Vice President

Mizoram tlawha rawn zin India Vice President M. Venkaiah Naidu chuan nimin khan Mizoram Legislative Assembly thutkhawm neih mekah thu sawiin, Legislative Assembly chu mipui hmasawnna atan tha ber ngaihtuaha sawihona hmun tur a nih avangin tullo leh awmze neilo a inhnialbuaina emaw intihbuaina hmun tur a nih loh thu a sawi.

Nimin-a Assembly thutkhawm ah hian Speaker Lalrinliana Sailo chuan Vice President lawmna thu a sawi hnu ah Vice President Venkaiah Naidu chuan Mizoram Legislative Assembly Session a thu a sawi thei chu lawmawm a tih thu sawiin, kumin May thlaah Mizoram Legislative Assembly kum 50-na lawm a ni dawn tih a lo hriatpui thu leh a lawmpui thu a sawi a. India ramin zalenna a sual chhuah kum 75-na lawma Azadi ka Amrit Mahotsav kalpui mek leh, Mizoram Legislative Assembly kum 50-na chuan India ram-a democracy ropuina leh hmasawnna a lantir thu a sawi a. Legislative Assembly chu mipui hmasawnna atan tha ber ngaihtuaha sawihona hmun tur a nih avangin tullo leh awmze neilo a inhnialbuaina emaw, intihbuaina hmun tur a nih loh thu a sawi a, hemi kawngah hian Mizoram Legislative Assembly chu entawntlak tak nia a hriat thu a sawi. Vice President chuan Mizoram State inrelbawlnaah Local/Village Level inrelbawlna ngaihpawimawh a ni chu lawmawm a tih thu sawi bawkin, Inthlan nikhua ah Kohhran leh tlawmngai pawlte'n thahnemngai taka tawiawm leh inthlan muanawm tak a awm theih nan a chanvo pawimawh an tak chelh thin chu fakawm a tih thu a sawi a. COVID-19 hrileng do kawnga sawrkar leh mipui tangrual taka an thawhhona te chu fakawm a tih thu a sawi bawk.

Vice President M. Venkaiah Naidu chuan Sustainable Development Goals (SDG) India Index 2021-ah Mizoram chu kum 2019-20 a Rank 21-na a nih atanga kum 2020-21 Index-ah Rank 12-na a a invawrh chho chu lawmawm a tih thu a sawi a. Hmasawnna atana inkalpawhna (transport infrsastructure) tihhmasawn ngaih-pawimawh a ni chu lawmawm a tih thu sawiin, Kuthnathawktute tihmasawn leh chawisang tura Agriculture leh Horticulture kawnga State in hma a lakna te, Tourism leh Industry tihhmasawn tura hma a lakna chu fakawm a tih thu sawiin, State hmalakna pui SEDP-in mipui dah pawimawh hmasa a hmalak a ni chu lawmawm a tih thu a sawi a. Hmasawnna hna thawh leh hmalaknate reng reng hi tun amite tan chauh nilo, kan tu leh fate chanvo tur tichhe lova, an tana ram tha leh nuam kan siam zel theihna tur zawnga kalpui tur a nih thu leh, mi harsa ber te chawikanna tur hawi zawnga kalpui a nih tur thu a sawi bawk.

State hmasawnna atan State leh Central sawrkar chu inhnaih taka thawkdun tlat tur a nih thu sawiin Vice President chuan, Mizoram tan pawh tunhnai ah Prime Minister's Development Initiative for North-East (PM-DevINE) Scheme hnuaiah cheng vbc. 600 dah a nih thu a sawi a. India hmar-chhak State-te hmasawnna sawrkar laipuiin a ngaihtuah thu a sawi rualin, heng State ten an Legislative Assembly ah hmeichhe member tam zawk an neih chu pawimawh a tih a sawi a. Tun dinhmun ah Parliament-ah pawh 11% chauh hmeichhia an nih thu a sawi.

Mahni pianpui tawng ngaihpawimawh nachang hriat chu tul a tih thu pawh sawiin, Tawng hrang hrang a tam thei ang ber thiam tum chu tha a tih rualin, chumi hma chuan mahni tawng-ah kan chian a, kan chawilar thiam hmasak a pawimawh a ni, a ti bawk.

Vice President-in thu a sawi zawh hian House Leader Chief Minister Zoramthanga chuan lawmthu sawina neiin State buai ber te zing ami ni thin kha tunah chuan State ral-muang ber Mizoram chu a nih tak thu leh, Vawiin thlenga Assembly rorelna boruak tha tak neih thin a nih chhan pawh he State ralmuanna in a ken tel thil a nih thu a sawi a. State dangte tan pawh he remna leh muanna hi entawntlak a nih ngei a beisei thu a sawi a ni.