Ni khat-a hri kai hmuhchhuah tlahniam ve zel

Mizoram-ah ni khat-a COVID-19 hri kai hmuhchhuah zat a tlahniam ve mek zel a, niminpiah khan Sample 2757 enfiah niin heng atang hian hri kai mi 569 hmuh an ni a, Sample enfiah atanga za zela 20.64 te chuan hri an kai a ni.

Niminpiah khan AMC-a RT-PCR Laboratory-ah Sample 101 enfiah niin hri kai mi 30 hmuh an ni a, Lunglei-a RT-PCR Laboratory-ah Sample 41 enfiah niin hri kai mi 16 hmuh an ni bawk. Fluorescent Immunoassay Test hmangin Sample 33 enfiah niin hri kai mi 2 hmuh an ni bawk. District hrang hranga TrueNat Laboratory-ah Sample 103 enfiah ni bawkin heng atang hian hri kai mi 26 hmuh an ni a, Rapid Antigen Test hmangin Mizoram-ah Sample 2479 enfiah ni bawkin heng atang hian hri kai mi 495 hmuhchhuah an ni bawk.

Nimin khan Mizoram-ah hri kai enkawl dam mi 805 an awm belh leh bawk a, heti hian nimin thlenga Mizoram-a hri kai hmuh tawh chu 2,16,605 niin an zinga 2,11,267 te chu enkawl dam an ni tawh a, hri kai hmuh atanga za zela 97.54 te chu enkawl dam ni tawhin hri kai enkawllai 4677 an la awm a, hri kai zingah mi 661 an boral tawh bawk a ni.