NUNGCHA HUMHALH

Kawng siamtha turin hrilh

Lawngtlai-a Central YLA hruaitute chuan Inrinni khan Lawngtlai khawpui luhna kawngpui pathum te chu tlawhin heng kawng-a hnathawktu Company hotute chu kokhawmin kawng siam-tha tura hma la nghal turin an hrilh. Central YLA hruaitute chuan Company hotute chu an hnathawh a muangchan avangin Lawngtlai District-a khaw-thlanglam khua te chuan harsatna namen lo an tawk tih sawiin, Fur lai te a nih avanga anni lam pawhin hriatthiamna an neih thu leh tunah chuan inhriatthiamna a awm tawh dawnloh thu an sawi a, tunkar atang hian an theihna zawng zawng nen hna thawk turin an hrilh bawk a ni. Central YLA hruaitute chuan 71 RCC-a OC pawh hmu nghalin an hnuaia hna thawk tha duhlo leh DPR anga hna thawk lo Company te chungah a tul anga hmalak a nih tur thu an hrilh bawk a ni.

Sawrkar phut nawn leh

Lunglei District a tlawmngai pawl intel-khawm chuan Lunglei-a RT-PCR khawl bun chung-changah sawrkar chu November 2021 ralhma ngeia chhuanlam engmah siam lova Staff leh tul dangte hman theih nghal tura dah fel vek turin an phut. Inrinni-a All NGO hruaitute inhmukhawm chuan Sawrkar hmalakna te vil zui reng a nih tur thu sawiin, khawl leh thildang tul pawimawh lei khawmna kawngah sawrkar ke pen dan vil zui tur bik inruat a nih thu an sawi a. Sawrkar hmalakna lungawithlak leh pawmawm a awm lo a nih chuan na zawka hmalak dan rel ho leh a nih tur thu thuchhuah siamin an tarlang a ni.

Vaccine pek mek zel a ni

Inrinni thleng khan Mizoram-ah COVID-19 Vaccine Dose 12,22,111 pekchhuah a ni ta a, mi 6,98,985 te hnenah Vaccine Dose 1-na pek niin hei hi hri la thei atanga chhutin 64.04% a ni a, heng zinga 5,23,126 te hnenah Dose 2-na pek a ni tawh bawk. Mizoram-a vaccine pek tawh zinga Dose 12,17,950 te hi sawrkar in a thlawna a pek te niin Dose 4161 te erawh chu Private damdawi In atanga man chawi-a pek an ni thung.

MPCC in raltlan tanpui

Myanmar raltlante tana NSUI (Mizoram)-in Congress Party hminga Vehbur an khawnte chu Inrinni khan Myanmar Refugee Relief Committee hnenah hlan a ni a, hemi puala inkhawm Aizawl Congress Bhavan Golden Hall-a neih ah Lalrindika Ralte MLA chuan Myanmar Refugee Relief Committee President Vanlalchhana hnenah a hlan a ni. Myanmar raltlante tanpui nana MPCC thilpek hi Buhfai Bag 30, thawmhnaw engemaw zat, Medical Equipment Rs 30,000/- man leh pawisa fai Rs. 20,000/- bakah bungraw phurhna tur motor hmanna tur Rs. 30,000/- a ni. Myanmar Refugee Relief Committee chhinchhiah danin Myanmar atanga raltlan hi 13,583 an tling tawh a ni.

BJP in Reiek-ah thilpek hlan

BJP Mizoram State Pradesh President Vanlalhmuaka chuan Inrinni khan Reiek khua tlawhin Reiek Branch YMA te hman turin Oxygen Concentrator, Oximeter leh Health & Hygiene Kit te a pe a, hemi puala inkhawm neih ah BJP President chuan Covid hripui len tirh atangin Central a an hruaitute nen kartin Meeting an neih thu sawiin, Mizoram in Covid vanga harsatna kan tawh loh na turin theihtawp chhuahin hma an la ve reng tih a sawi a. Union Health Minister hnenah RT-PCR khawl kan mamawh dan pawh an thlen thu leh min rawn pek thu sawiin, tuna an la function tir lo nia lang thung chu pawi a tih thu a sawi bawk.

Tuirial Bial-ah bialtu MLA tlin lawmna neih a ni

MNF Tuirial East leh West Block buatsaihin Inrinni khan Tuirial Bial MLA thlantlin thar K. Laldawngliana tlin lawmna inkhawm chu Lungdai Bazar Veng leh Kawnpui Hmar Veng-ah neih a ni a, he hunah hian MLA thar chuan, “Tuirial bial-ah hian Pathian in rawngbawl turin min kochhuak a, kawng lakah min phatsan lo ang ka tih ka ring,” tiin inthlan dawna a thutiamte chu tihlawhtlin vek a tum tih a sawi a. A bial mite tan bial chhungah ban phakin a awm dawn tih a sawi bawk.

Minister in SBI Branch thar a hawng

Health Department changtu Minister Dr. R. Lalthangliana chuan Inrinni khan Aizawl-ah State Bank of India, Luangmual Branch a hawng a, he hunah hian Minister chuan Aizawl tlak lama cheng mipuite tana rohlu an nei thar chu lawmawm a tih thu sawiin, Banking Services hrang hrang kaltlangin malsawmna a keng tel dawn tih a sawi a ni. State Bank of India (SBI), Luangmual Branch hi Mizoram-a SBI Branch 46-na a ni a, Luangmual Chhangurkawn-ah awmin MLA leh bialtu AMC Executive Councillor te pawhin an hmanpui bawk a ni.

Khawvel Sunday School Ni

Nimin, November thla-a Pathianni hmasa ber khan ‘Khawvel Sunday School Ni’ hman a ni a, Kohhran thenkhat chuan urhsun taka he ni hi hmangin hriat theih chinah Presbyterian Kohhran chuan he Ni puala thupui thlanbik chu Chawhma leh Chawhnu Inkhawm ah an zirho a, Baptist Church of Mizoram (BCM) chuan ‘Mi bote Krista hnena hruai’ tih thupui chu an zirho bawk a ni.

Sunday School hi kum 1780-ah England ram, Gloucester khuaa Robert Raikes-a din a ni a, India ramah chuan July 9, 1803 atangin Sunday School hi neih niin Mizoram-ah chuan February 20, 1898 atangin neih a ni a, Synod In-khawmpui Vawi 97-na Report-a a lan danin tunah hian MSSU hnuaiah Sunday School 1032, Hotute 4562, Zirtirtu 46,866 leh Zirtu 3,70,937 an awm mek a ni.