SVEEP hmalakna in Serchhip-ah Football khel

Systematic Voters Education and Electoral Participation(SVEEP) hmalakna hnuaiah nimin khan Vote nei thar te leh Voter naupang zawkte tan Serchhip Sports Stadium-ah Football match buatsaih a ni.

District Election Office buatsaih he Football Match khelh hmaa inkhawm tawi neih ah District Election Officer Kumar Abhishek IAS chuan ram roreltu thlanna ah voters ten kan aiawh thlanga kut kan thlak ngei hi democracy bulthut a ni a, kum tling chin tan chuan kan tihmakmawh mawhphurhna a ni, a ti a. Vote thlak thei tawh khua leh tui ten Electoral Roll a hming an thun ngei theih nana hmalak te, Roll a chuang tawh khua leh tui ten inthlannaa vote an thlak ngei theih nana hmalakte chu SVEEP thiltum a ni tih sawiin, khua leh tui kum tling tawh Electoral Roll a la inziaklut lo te chu tun November, 2021 chhunga inziaklut vek turin a sawm nghal bawk.

Systematic Voters' Education and Electoral Participation (SVEEP) programme kaltlanga Doorstep Enrollment kalpui mek chu lo hmang tangkai turin kum tling thar te chu a sawm a. Nakum January 1-a kum 18 tling tur chin te tan Phone No. 6909702642-ah mahni hming, nu leh pa hming leh address thawnin ni hnih chhungin a bialtu BLO ten enrolment neih sak turin an pan nghal zel dawn tih a sawi bawk.

Vote nei thar (New Voters) leh Vote nei tawh kum naupangte zawk (Young Voter’s) te tana 'SVEEP Football Match' ah hian Govt. Serchhip College leh Govt. Higher Secondary School a zirlai naupangten Football khelin Govt. Serchhip College hi 5-2 in an chak a ni.