Latest News

Chanchin thar thenkhat :

EMRS Building pali hawng

Social Welfare Minister Dr. K. Beichhua chuan nimin khan Eklavya Model Residential School (EMRS) Pukpui, Lunglei-ah Building thar pali a hawng a, heng building hawn tak te hi Ground Floor leh First Floor nei vek niin Girls Dormitory, Boys Dormitory, Additional Classroom leh Staff Quarters building te an ni. Ministry of Tribal Affairs atanga sum hmuh cheng nuai 331.87 hmanga sak heng building te hi Lushai Engineers, Ramhun Venglai, Aizawl ten an sak niin October 2018 khan sak tan a ni. He hunah hian SWD Minister chuan EMRS chu Tribal Zirlaite tana Ministry of Tribal Affairs (MoTA) flagship programme a ni tih sawiin, Mizoram atanga hun rei tak UPSC exam kan tling thei tawh lote hi tan a na hle a, zirna-ah nasa zawka hma kan sawn theih nan EMRS hi Mizoram RD Block tinah dah tumin hma kan la mek a ni, a ti bawk.


Dan lova sumdawng enfiah

Mizoram Merchant Association (MIMA), Dawrpui leh Zarkawt LC leh Panhnah leh Kuhva zuar ten Joint Meeting nei-a an lo rel tawh angin nimin zing khan heng pawl te hian Police te nen Mizo hming hawha hnamdang sumdawng enfiah hna an thawk a, MIMA chuan Mizo hming hawha hnamdang sumdawn man an awm nual tih sawiin, Police te kutah an awm thu leh heng mite hi Court ah hruai an nih hunah man an nih chhan te hriat-chian an nih theih nan hmalatute pawh hi koh ve ngei nise an duh tih an sawi a. Dan dik lova Mizoram-a sumdawnna titute hi an phu anga hrem ngei an duh thu an sawi bawk.


Vote nei thei 17,911 awm

Tun thla ni 30-a Tuirial Bial Assembly bye-election neih tura hman tur Photo Electoral Rolls, 2021 chu nimin khan tlangzarh a ni ta a, he Electoral Roll atanga a lan danin Tuirial bial-ah hian Polling Station 27 awmin Vote nei mipa 8819 leh hmeichhia 9092, an vaiin 17,911 an awm dawn a, Voters sangkhat aia tam awmna Polling Station pathum a awm dawn a ni.


Mizoram CIC pension dawn

Mizoram-a Chief Information Commissioner (CIC) Lalduhthlana Ralte IFS (Rtd) chu tun thla ni 17 khian Pension in a chhuak dawn ta a, nimin khan Mizoram Information Commission Office-a thawktute chuan a thlahna hun an hmang a ni.  Lalduhthlana hi 1983 batch IFS Officer niin December 21, 2016 khan CIC hna hi a chelh tan a ni.


LADC-ah Chairman thlang

Lai Autonomous District Council-a V. Zirsanga kaihhruai sawrkar thar a din hnuah nimin khan Chairman thlanna neih niin Lawng-tlai Vengpui bialtu MDC, VL. Hmuaka chu chuhtu awm lova thlantlin a ni a, he hunah hian CEM V. Zirsanga leh Opposition Leader T. Zakunga te chuan thu an sawi bawk a ni.


Revenue Office tihchangtlun dan tur sawiho

Land Revenue and Settlement Minister Lalruatkima chuan nimin khan District thar pathum-a Settlement Officer te kokhawmin Revenue Office tihchangtlun dan tur a sawipui. LR&S Directorate-a he sawihona ah hian Revenue Minister chuan Revenue Department chu mipui hne renga hnathawk, tuktin mamawhtu leh pantu ngah em em an ni tih sawiin, hmasawnna hna reng reng leilunga innghat (land based) a nih bawk si avangin Sawrkar leh mipui mamawhna a sang a. Chuvangin District tharah pawh changtlung leh mumal zawka an kal a tul hle tih a sawi a ni.

He hunah hian District thar pathum-ah Assistant Survey Director (ADS) an la awmloh avangin ruahmanna siam a ni a, thawktu indaihlohna awm phuhruk dan turte pawh he hunah hian sawiho a ni bawk.

Comments

Chhiar Hlawhte