Latest News

Mizoram-ah hri kai hmuhchhuah an la pung zel

COVID-19 hri kai hmuhchhuah zat la tlahniam hlei thei lovin niminpiah khan Mizoram-ah Sample 8025 enfiah leh atangin hri kai mi 1028 hmuhchhuah an ni leh a, Sample enfiah atanga chhutin za zela 12.81 te chuan hri hi an kai a ni.

Niminpiah khan ZMC-a RT-PCR Laboratory-ah Aizawl District atanga Sample lak 1361 enfiah leh niin heng atang hian hri kai mi 325 hmuhchhuah an ni a, Veng leh khua 49 ami te niin Veng mal-a hri kai hmuh tamna ber Aizawl Dinthar-ah hri kai mi 49 hmuh an ni a, Veng mal-a hri kai mi 10 leh a aia tam hmuhna 13 lai ala awm bawk a ni. Heng bakah hian Aizawl District atangin Fluorescent Immunoassay Test hmanga Sample enfiah 38 awm bawkin heng atang hian hri kai mi mi 7 hmuh an ni bawk a, an vai hian Aizawl khawpui chhung ami te an ni.

District hrang hranga TrueNat Laboratory-ah niminpiah khan Sample 375 enfiah ni bawkin heng atang hian hri kai mi 65 hmuh an ni bawk a, an zinga 33 te chu Champhai District ami te niin Mamit District-ah 9, Lunglei District-ah 7, Lawngtlai District-ah 6, Aizawl District-ah 4, Serchhip District-ah 3, Hnahthial District-ah 2 leh Khawzawl District-ah hri kai mi pakhat hmuh an ni bawk.

Rapid Antigen Test hmangin niminpiah khan Mizoram-ah Sample 6251 enfiah ni bawkin heng atang hian hri kai mi 631 hmuh an ni leh bawk a, an zinga 251 te chu Aizawl District a hmuhchhuah niin Lunglei District-ah 108, Serchhip District-ah 104, Siaha District-ah 36, Mamit District-ah 30, Lawngtlai District-ah 26, Champhai District-ah 24, Kolasib District-ah 22, Hnahthial District-ah 15, Khawzawl District-ah 13 leh Saitual District-ah hri kai mi pahnih te hmuh an ni bawk.

Nimin khan tlai dar 5:00 thlengin hri kai enkawl dam 891 awm belh leh thungin hri kai enkawl dam pawh an pung ve zel a, heti hian nimin tlai dar 5:00 thlenga Mizoram-a hri kai hmuhchhuah chu 1,09,818 niin an zinga 96,303 te chu enkawl dam ni tawhin hri kai hmuhchhuah te atanga za zela 87.69 te chu enkawl dam an ni tawh a, hri kai enkawllai 13,142 an la awm mek a ni. Hriat theih chinah nimin khan Mizoram-a hri kai zingah mi pathum an boral leh a, heti hian Mizoram-a hri kai te zingah mi 373 zet an boral tawh a ni.

Comments

Chhiar Hlawhte