IGC, Luangmual-a Industry siamtute an mangang

Industrial Growth Centre (IGC), Luangmual-ah Dan lova ram nei leh ram inpek a pun zel avangin Industry siamtute an mangang nia thudawn a ni.

Tunkar Nilaini khan Industrial Growth Centre (IGC), Luang-mual-a P. Zalen Oxygen Plant-ah Mizoram Industry Owner Association IGC hruaitute chu thukhawmin, Mizoram sawrkar Commerce and Industry Department-in Land Lease nei veka Mizoten Industry an dinna tura ram an hauh sa chu tihchingpenin a awm mek tih an sawi a. Sawrkar atanga dan ang taka ram pek, allotment hmu ve lo ten dan ang taka ram luahtu leh a taka Industry kalpuitute tan harsatna an thlen nasa tial tial nia sawiin, he thil tha lo tak, hun kal zela ram tana thil pawi liantham thleng thei veng tur hian chak zawka hma lak an tum bakah, thuneihna keng-kawhtu tur sawrkar department hotute hnenah puih an inhuam tih thlen an tum thu an sawi bawk a ni.

Industry neitute intelkhawmna pawl President, Lallura Pachuau chuan ram hmasawnna tura ruahman, Luangmual-a IGC dinhmun a him lo tih sawiin, tunah hian mimal leh pawl dang bakah Kohhran thleng pawhin ram nei an awm tawh tih a sawi a. Zuangtui Industrial Estate-ah thil tha lo tak thleng tawhin, mi dangin zaa 80 ram an neih tawh avangin industry dintuten harsatna an tawk nasa hle tih pawh sawiin, Luangmual IGC dinhmun pawh hi a ngaihtuahawm telh telh a, ram hnuk pawimawh a nih laiin thangthar lo awm zel ten Industry an dinna tur hmun awm tawh miah lovin thiltithei tuten emaw an luah fai mai ang tih a hlauhawm takzet a ni, a ti.

Industry neitute hian Power Supply, Tui leh Kawngpui tha zawk an neih theih nan hmalak an tum thu pawh sawiin, Department leh sawrkar in an dinhmun leh IGC chhunga thil thleng mekte ngai pawimawh lehzual se an duh hle tih an sawi bawk.