Cheng nuai 90 senga Serchhip District Veterinary Hospital building sak thar hawn a ni

NABARD hnuaia Rural Infrastructure Development Fund (RIDF) sum cheng nuai 90 hmanga sak Serchhip District Veterinary Hospital building chu nimin khan AH & Vety Minister Dr. K. Beichhua chuan a hawng.

Serchhip District Veterinary Hospital building thar Training Hall-a hawnna inkhawm ah AH & Vety Minister chuan hripui leng karah sawrkar chuan theihtawp chhuahin hmasawnna hna te a thawk zel tih sawiin, chung zinga pakhat Serchhip District Vety Hospital building hawn a ni ta chu lawmawm a tih thu a sawi. Vety Minister chuan an sawrkar a lo din tirh atangin Mizoram in Sa ah, a bikin Vawksa ah kan intodelh theih nan nasa takin hma an lak thu sawiin, amaherawh chu African Swine Fever avanga harsatna thleng ta chu pawi a tih thu leh he hri hi pumpelh ngei tumin sawrkar chuan beihpui a thlak thu a sawi a. He natna rawn lut hi sawrkar in himna tura Dan a siam te mi tute emaw in an zawm thatloh vang a an thu pawh sawiin, ASF vanga Vawk chan ten zangnadawmna an hmuh theih dan tur sawrkar laipui-ah amah ngei pawhin dawrin hma an lakna te a sawi bawk. Hei bakah hian Minister chuan ranvulha eizawn theihna remchang kan ram-ah a tam avangin thiamna lama intahhriam deuh deuh tum a ni tih pawh sawiin, tunhnaiah Dispensary 6 chu Hospital-ah hlankai niin Rural Animal Health Centre 35 chu Dispensary-ah hlan kai a nih tawh thu a sawi bawk.

Serchhip-a Veterinary Hospital hawnna hunah hian Veterinary & Sericulture Board Vice Chairman C. Lalmuanpuia MLA pawhin tunlai ah chuan mihring ten ran kan vulh satliah tawhlo tih sawiin, uluk takin kan ranvulh te kan enkawl tawh thu a sawi a. Chumi atana pawimawh tak tur Vety Hospital building hawn a ni chu lawmawm a tih thu a sawi a. Hri leng avanga harsatna tam tak karah AH&Vety Minister kaihhruaina hnuaia hmasawnna tam tak hmuh tur awm pawh lawmawm a tih thu sawiin, kan ranvulh te an hrisel a, kan lo intodelhna tur leh Department hmasawnna tura Minister hova AH&Vety Department a thawktute hmalakna chu lawmawm a tih thu a sawi bawk.

Serchhip District Veterinary Hospital building hawnna hun hi AH & Vety Department Secretary Lalzarmawii IAS chuan kaihruaiin Dr. H. Laltlanmawia, Director, AH & Vety chuan Technical Report a pe a. He Building hi RIFD-XXIII (NABARD) sum cheng nuai 90 senga sak niin Malsawm Construction & Consultancy Service, Kulikawn, Aizawl ten a sak hna an thawk a, Mizopa chhiara chhawng hnih (2) niin a chungah hian Training Hall siam nghal a ni a, a dung ft. 57 leh a vang ft. 30-a zau a ni.