Fortified Rice rawn thleng

Serchhip District chhung Anganwadi Centre hrang hranga sem tur Buhfai thami, Fortified Rice chu Serchhip Kudam-ah rawn phurh thlen niin semchhuah dan tur erawh tihfel ala ni lo thung.

Sawrkar laipuiin naupangte zinga thisen tlakchhamna (anemia) leh undernutrition um bo tura a hmalakna pakhat, Fortified Rice Scheme hi Mizoram-ah chuan a bultanna atan Mamit District-ah kalpui ni tawhin District hrang hrang ah kalpui vek tura ruahman a ni a, Fortified Rice hi mihring ei atana him leh Food Safety and Standards Authority of India (FSSAI) pawhin a him tih an pawm thlap a ni.

Fortified Rice Scheme hnuaia buhfai rawn thleng hi Serchhip District-ah chuan Integrated Child Development Services (ICDS) hnuaia Anganwadi Centre hrang hranga sem tur a ni tih Serchhip DCSO C. Zadailova chuan LENKAWL a hrilh a. He Scheme hnuaia Mid-Day Meal-a buhfai dawn tur chu tun tuma ruahman ah hian ala tel loh thu a sawi thung. He Scheme hi naupangte zinga thisen tlakchhamna (anemia) leh undernutrition um bo tura a hmalakna niin, buhfai ah Iron, Folic Acid leh Vitamin B-12 an telh a, buhfai pangngai aiin a man pawh a to deuh a, buhfai pangngai nen 1:100 ratio a chhum pawlh tur a ni.

World Health Organization (WHO) chuan chaw atana buhfai ring mihring chenna ah, mipui te hriselna kawnga tihhmasawn nan Fortified Rice (Iron, Vitamins leh Folic Acid telna buhfai siam) ei hi a pawimawh thu an lo puang tawh a ni.