Kumin ah loneitu ten FAW an tuar nep hret; Vaimim chin nasa takin a pung thung

Agriculture Minister, C. Lalrinsanga chuan Vaimim eichhetu Pangang, Fall Army Worm (FAW) chu Mizoram-ah hmuh leh ni mah se kum hmasa aiin loneitu ten an tuar nep zawk tih a sawi a, Vaimim chingtute chu an Vaimim beitu Pangang chu tihlum ngei ngei turin a chah bawk.

Thuthar thehdarhtute ten an kawmna ah Agriculture Minister, C. Lalrinsanga chuan nikum lama an lo buaipui tawh Vaimim eichhetu Pangang, Fall Army Worm chuan kum thum chhung vel Mizoram chamchilh tura ngaih a nih thu sawiin, hei vang hian kumin ah District tinah pawh an inring sa tih a sawi a, a theih ang angin Awareness pawh an inpek thu leh kumin hian FAW hi a awm leh tho chungin kumdang ai chuan a loneitute pawh an in veng thiam deuh tawh tih sawiin, kum hmasa aiin an tuar nep deuh tawh tih a sawi a. Tlem-a lo tuar fal deuh an awm pawhin Vaimim tet deuh lai a nih avangin khami hunah khan theihtawp chhuaha tan an lak chuan a thang tha ve leh mai tih a sawi bawk.
Agriculture Minister chuan FAW chu khawlum leh boruak uap-ah a awm duh avangin tun dinhmun ah khawthlang lamah a tam deuh nia an hriat thu a sawi a, hmun vawt lamah hmuh tur awm ve mah se a tam lutuk lo tih a sawi a. FAW thattu tur rannung inthlahpun tirna hmun, Bio-Control Laboratory sakna tur pawh neih theih an inbeisei tih a sawi a. Hei hi hman theih a nih hunah chuan FAW avanga harsatna awm thin chu nakum lamah chuan a ziaawm lehzual beisei a nih thu a sawi bawk.
Agriculture Minister chuan nikum khan FAW hian Vaimim zaa 35 vel a tihchhiat sak nia an hriat thu pawh sawiin, heti chung hian kan Vaimim tharchhuah erawh a tlem lutuk chuanglo tih a sawi a, tunah hian District hrang hrang atangin Report an lakkhawm mek thu leh nikum lam ai chuan ziaawm deuh tura an inngaih thu a sawi a. Vaimim eichhetu Pangang te hi tihhlum zel a nih loh chuan kumdang-a lo piang leh turin an la inthlahpung zel thei niin a sawi bawk.
Hri leng avanga ei leh bar-a harsatna thleng thei thlirin inkharkhip a nih hnuah Vaimim chingtu an pung tih pawh Agriculture Minister chuan sawiin, Agriculture Department chuan Vaimim chi hi quintal 400 vel a sem tawh thu a sawi a. Nikum lam aiin Department lam pawhin Vaimim chin chu an uar thu leh SEDP atangin cheng vbc. 5 chuang dah a nih thu sawiin, District tinah engemaw zat chin a nih thu a sawi. A tirah Vaimim chi hi quintal 190 vel an lak thu leh mipui mamawhna a san avangin quintal 200 an chah leh thu sawiin, hei hi sem darh leh a nih tawh thu a sawi a. Heng bakah hian mimal te pawhin anmahni remchan anga an chin thu a sawi bawk.

Comments

Chhiar Hlawhte