Sawrkar in zirna lam leh mipui hriselna lam a ngai pawimawh zual dawn - Zoramthanga

Chief Minister, Zoramthanga chuan tun sawrkar chuan zirna lam (Education) leh mipui hriselna lam (Health Services) a ngaih pawimawh zual tur thu a sawi a. “Zu zawrh a ni leh ta rih hi mipui, Kohhran leh ram in min hriatthiam a ngai a ni,” a ti.

Tuikum MNF Block huaihawta MNF kaihhruai sawrkar thar lawmna nimin a Thentlang Playground-a neih a hmanpuina ah he thu hi sawiin MNF President leh Chief Minister, Zoramthanga chuan tun sawrkar chuan zirna lam (Education) leh mipui hriselna lam (Health Services) a ngaih pawimawh zual tur thu sawiin, “Sawrkar hmasa in kan kihhnawka an sawi, School kan upgrate te kha sava chawl lungmuang angin ke khatin a ding \awk \awk a, kehnih-a nghet taka dintir kan tum a ni. Zirtirtu indaihlohna nasa lutuk tihziaawm nan zirtirtu lak thar an ni ang a, zirna lama hnathawk dangte pawh lak belh an ni ang a. School Lump-sum pawisa tihpun a ni ang a, zirna kawngah nasa takin hma thar lak a ni dawn a ni,” a ti a. “Health Service kawngah pawh nasa taka hmalak thar kan tum a ni,” a ti bawk.
Chief Minister chuan, Zu zawrh chungchang sawiin, "Zu zawrh thu ah hian kan tihtheih phak bakin thil a thleng leh ta rih a. Sawrkar hmasa kihhnawk hi a thlum em a, ramin kan rui ta a ni. March ni 31 a lo thleng ang a, Zu khapna tur hi tihfel a ni tawh ang,” a ti a. “Zu zawrh a ni leh ta rih hi mipui, Kohhran leh ramin min hriathiam a ngai a ni," a ti bawk.
Chief Minister chuan, “MNF nge nge a danglam in tih turin he ram hi kalpui kan tum a, Zoram malsawmna haichhuak turin theihtawp kan chhuah dawn a ni,” a ti a. "Neitu sawrkar leh mikhual sawrkar chu a danglam nasa khawp ang. Tun chinah pawh hian an budget hlui kan kui hi an Budget thar chen aiin kan ziaawm mah a nia,” a ti bawk.
Nimin a Sawrkar thar lawmna hi School Education Minister, Lalchhandama leh Tuikum bialtu MLA leh Assembly Deputy Speaker, Er. Lalrinawma te pawhin an hmanpui a. Bialtu MLA chuan Sawrkar reng reng mipui thlawp loh sawrkar a chak ngai tih sawiin, an Policy te a hlawhtlinna tura thawhpui turin mipuite chu a sawm bawk a ni.

Comments

Popular posts from this blog

PAN CARD an tih teh fo hi - Laldinpuia