Jt. NGO ngenna anga inhnuhdawh hniallo

Mamit District chhung Hachhek Constituency-a PRISM Party Official Candidate atana ruat, Eddy Zosangliana Colney chuan Hachhek bial chhunga Jt. NGO te ngenna angin a \ul phawt chuan inhnuhdawh a hreh loh tur thu a sawi.

Hemi chungchanga PRISM Party thuchhuah in a tarlan danin Party \henkhatin Tuikuk candidate siam an tum chungchangah Hachhek bial chhunga NGO hrang hrang inzawmkhawm pawl te nizan hmasa, Nov. 5, 2018-a Zamuang khua a Meeting chuan Candidate in\awm (Common Candidate) siam an pass a, nizan hmasa vek khan Rengdil khuaa political party tin aiawhte an kohkhawmna ah Eddy Zosangliana Colney chuan he thu hi sawiin, "Kan ram, hnam leh sakhaw himna tur anih phawt chuan inhnuhdawh hi ka thei a ni. Kan party hotute ka rawn ang a, anni pawhin min pawmpui ngei ka ring," a ti.

Eddy Zosangliana Colney chuan tuna a dinhmun thleng tur hian thawhrim a ngaihzia leh hun rei tak nghah a ngaih thu sawiin, Tuikuk avanga an thawhrimna zawng zawng holam taka tawp thei dinhmuna a ding leh hetiang thu ngaihtuah ngai khawpa a awm ta mai chu a lungchhiatthlak takzet tih a sawi a. "Kan ram, hnam leh sakhaw himna tluka pawimawh dang eng nge awm chuang? A \ul anih phawt chuan kan inhlan ral ve ngam tur alawm. Mite mahin an nunna an thâp a, Jt. NGO te ngenna anga in withdraw a ngai anih pawhin ram leh hnam him nan chuan kan inhlan ve mai tur a ni," a ti bawk.