UNO leh Mizoram sorkar thawhdunna tur thuthlung ziak.

United Nations Organisations (UNO) peng hrang hrang in a Eco System siam\hat hna leh humhalh tura beihpui thlakna tur bul \anna, United Nations Joint Initiative Project in Mizoram chu nimin khan Chief Minister Pu Lal Thanhawla chuan a hawng.

He hunah hian Chief Minister Pu Lal Thanhawla chuan India ram a la awm ngailo Mizoram-ah a hmasa ber tur atana United Nations Organisation peng hrang hrangin ecosystem based livelihood atan UN Joint Initiative Project an rawn kalpui tur chu a lawmawm a tih thu sawiin, Mizoram in mirethei,chanhai leh pachhiaten leirem an rah theihna tura sorkarin programme a kalpui mek tihhlawhtlinpui tur leh chak zawka hmasawnna kan neihna tura kawng min rawn dap sak a, khuanu min pek ram leilung, nungcha leh thing leh maute a humhalh dan \ha zawk min kalpui tur chu phurawm a tih thu a sawi a. UN Team te hi an thil tumah an chiang tih sawiin, “Keimahni zawk hi kan chiang lovang tih a hlauhawm a, an hnung kan zui zo lovang tih ka hlau a ni,” a ti bawk. He hunah hian UN Resident Coordinator, Pi Lise Grande chuan project thil tum ber chu ecosystem siam \hat leh hun lokal zel tur atana humhalh a ni, a ti a. Mizoram hmun ralmuang leh boruak duhawm awmna a ni tih sawiin, hnathawhna ah pawh a ram leilungfa ten thil an lo kalpui dan \hin \ha lai awmte chu hman ve \hin a ni ang, a ti bawk.
    He thawhdunna tur Project-ah hian Mizoram sorkar aiawhin Chief Secretary Pi L. Tochhong chuan hming ziakin UN aiawh hian Pi Lise Grande, UN Resident Coordinator in a hming a ziak a, thawhdunna hi kum 2014 - 2017 chhung atana ruahman niin senso ngai tur hi hemi hun chhung atan hian US Dollar 4,000,000/-(India pawisa chuan Rs.2,454/- lakhs) UN hian a tum dawn a, Mizoram sorkarin cheng nuai 122.7 a tum ve bawk dawn a ni. UN Orga-nisation pali - United Nations Development Programme (UNDP), United Nations Food & Agriculture Organisation (FAO), United Nations Indutrial Development Organisation (UNIDO) leh United Nations International Labour Organisation (ILO) te chu he thawhhona ah hian an tel dawn a ni. He Project in a tum bulpui ber chu Food Security, Livelihood Security, Energy and Environment Security, Ecological Balance, Sustainable Livelihood, Income Generation leh Ecosystem venhimna atan mau hman \angkai, Agriculture leh a kaihhnawih hman \angkai leh Market Linkage te niin tun a\anga hun reilote ah Aizawl-ah Office hawngin hna an thawk \an nghal dawn a ni.