Staff Nurse awm loh avanga harsatna tawk an beidawng?
Serchhip District Jail Inspection Team te chuan nimin khan Principal Magistrate Josangzeli hovin Serchhip District Jail tia hriat thin, District Prison & Correctional Home an tlawh a, Jail thuneitute leh Jail tang te kawmin an harsatna te an zawt a, anni hian Jail-a Duty tur Doctor chu sawi loh, Nurse Duty tur takngial pawh an neih loh avanga harsatna hrang hrang an tawh thin thu te lo sawiin, thuneitute hnena an thlen pawhin awmzia a awm theih loh thu leh an beidawn hial tawh thu an sawi a. Nikum August ni 5 khan Serchhip District Jail-a thawk thin Staff Nurse chu Aizawl-ah sawn a ni a, hemi hnu hian Staff Nurse hi an la neih loh thu leh thuneitute hnenah pawh an lo thlen fo tawh thu an sawi a ni.
Serchhip-a District Prison & Correctional Home-ah hian nimin tlai thleng khan tang mi 94 an awm mek a, an zinga mi 87 hi mipa niin midang 8 chu hmeichhia an ni. Rukruk vanga Jail tang hi an tam ber a, mi 43 zet niin an zingah hian hmeichhia pakhat a tel a. ND&PS Act vanga tang mi 17 awm mekin MLP Act vanga tang mi 16 an awm bawk a, hursualna kawnga naupang khawih (POCSO) vanga tang mi 9 leh chhan dang vanga tang mi 9 an awm mek a ni.
Jail Inspection Team te hian Jail tang te ei tur Artui leh thlai chin tur chihrang hrang an ken sak a, nimin vek khan District Hospital Serchhip atangin Doctor 2 leh Clinical Psychologist 2 ten tlawhin Jail tang te hi Free Medical Clinic & Mental Health Awarness an neihpui a ni.