Mizoram-ah PwD tan building duhthusam lo a tam; Rualbanlo mi 106 in sawrkar hna thawk mek

Mizoram-a sawrkar Office, Biak In leh punkhawmna hmun hrang hrangah pianphunga rualbanlote kal ve theihna tur siam tur anih laiin tunhnaia enfiahna ah rualbanlote kal ve theihna tura building duhthusam lo a tam hle tih hmuhchhuah a ni. Hetihlai hian pianphunga rualbanlo zingah Mizoram sawrkar hnuaia thawk mek mi 106 an awm.
Rualbanlote enkawl tur leh an hamthatna awm ang ang te ngaihtuahpui tura tih Persons with Disabilities (PwD) Commissioner Vanlaldiki Sailo chuan tunhnaia Mizoram hmun hrang hranga Biak In, Office building leh vantlang punkhawmna hmun an endiknaah pianphunga rualbanlote tana kal theih lohna a tam bakah inthiarna pawh a awm tha lo hle tih a sawi a. “The Rights of Persons with Disabilities Act, 2016 in rualbanlote hamthatna tura a duan pakhat Access Audit hi sawrkar laipui chuan a ngai pawimawh a, mi tinin vantlang hmunhma awlsam taka an luh leh chhuah theihna tura awlsamna remchang siam hi sawrkar duhdan a ni a, mi tin tih hian rualbanlote pawh a huam vek a ni,” a ti.

Persons with Disabilities Commissioner chuan hmun hrang hrang endik hian Mizorama District 11 an fang chhuak tawh tih sawiin, hmun 106 an enfiah tawh niin a sawi bawk a, an la tlawh bak te pawh tlawh chhunzawm zel an tum tih sawiin, “Kan endiknaah hian a theih chin chinah rualbanlote tana kal theihna siam turin kan ngen a, siamtha leh ta pawh an awm avangin kan lawm hle a. Chutih laiin building thenkhat erawh siamthat hleih theih loh a awm bawk a. Kum 2016 hnu lama mipui punkhawmna hmunah rualbanlote kal theihna tur siam vek tur anih laiin tun hnaia sawrkar building sak thenkhatah hetiang hi an plan siamah a awm lo a, hei hi a chhan ber nia lang chu Consultation Firm lamin an project-ah an lo telh thin loh vang a ni,” a ti bawk.

Mizorama rualbanlo zingah sawrkar hnathawk mi 106 an awm mek niin a sawi bawk a, heng te hi Group 'A' ah 10, Group 'B' ah 33, Group 'C' ah 32 leh Group 'D' ah 31 te an ni a. Sawrkar hnathawk zingah hian MCS, MIS, MF&AS leh College Lecturer pawh an tel a. “Sawrkar hnalak hrang hrangah hian rualbanlo te tan hna awm atanga 4% hauh sak tur a ni a. Tunhma lam chuan hei hi hna latuten a takin an kalpui thin lo a, mahse lehkha nen kan umzui hnuah chuan tunhnaia hnalak hrang hrangah rualban-lote tana hna hauhsak hi an zawm tha a, lawmawm kan ti hle a ni,” a ti bawk.

* Rualbanlote humhalhna dan 'The Rights of Persons with Disabilities Act, 2026' hi December ni 28,20216 atangin hman a ni.

* Kum 2021 chhiarpui-ah Mizoram-ah pianphunga rualbanlo mi 15160 awmin, an zinga 8198 hi mipa niin hmeichhia 6962 an awm bawk.

* Rualbanlohna hi chi 21 a awm a, Doctor ten an enfiahna atanga 40% chin hi rualbanlo-a chhiar a ni.

* Mizorama rualbanlo zinga mi 7800 chauhin rualbanlo UDID card an nei.

* Mizoram pumah rualbanlo School 8 a awm mek a, hengte hi Aizawl District-ah 5 leh Lunglei, Serchhip leh Kolasib District-ah pakhat theuh a ni.