Union MoS for Sports rawn zin

Union Minister of State for Youth Affairs and Sports Raksha Nikhil Khadse-i chuan ni hnih cham turin nimin khan Aizawl a rawn thleng a, Lengpui Airport-ah Sports Minister Lalnghinglova Hmar leh Protocol Officer C. Lalremruati ten an lo hmuak a ni.
Union Minister Raksha Nikhil Khadse-i hian nimin vek khan Aizawl Mission Vengthlang-a SAI Contact Sports Centre tlawh nghalin MY Bharat Mizoram aiawhte, Mizoram Olympics Association leh Sports Association aiawhte a kawm a, Sports Minister Lalnghinglova Hmar chuan Mizoram sawrkarin sports tihchang-tlun leh hmasawnna atana hma a lakna chi hrang hrang a tarlang a, Mizoram in National Level leh International Level-a hlawhtlinna a tawnte sawi langin, Hockey Academy for Boys kan mamawh thute, Mizoram sawrkarin Vision Olympics 2036 atana hma a lak mek dan leh ruahmanna a siam te pawh a tarlang a ni.

Mizoram Olympics Association (MOA) leh Sports discipline hrang hrang Football, Hockey, Badminton, Archery, Weightlifiting aiawhte pawhin Union Minister of State hnenah hian an hmalakna leh an mamawh te lo thlenin, theihtawp chhuaha a lo bawhzui dawn thu Minister hian a sawi a. Hemi hnu hian Union Minister hian Saitual a pan nghal a, Vawiin hian Kolasib a tlawh leh ang.