‘Thenzawl Peace City Master Plan’ buatsaih mek Mi-PRAGATI thutkhawm ah thlirho a ni
Nimin khan Chief Minister Lalduhoma hovin Thenzawl Peace City tura Master Plan buatsaih mek chu thlirho a ni a, heng bakah hian State chhunga hmasawnna hnathawh lian zual te thlirho a ni bawk. Nimin khan Chief Minister Lalduhoma hovin Mizoram Pro-Active Governance and Timely Implementation (Mi-PRAGATI) thutkhawm chu CM Conference Hall-ah neih a ni a, he hunah hian State chhunga hmasawnna hnathawh lian zual thlanchhuahte thlirho niin hna kal muan chhan te, harsatna awm sutkian dan tur te leh hmalak zel dan tur te sawiho a ni a. He hunah hian Thenzawl Peace City tura Master Plan buatsaih mek chu thlirho niin, sq. km 85 huamin hei hian Thenzawl-a Village Council 6- Thenzawl East, Thenzawl West, Thenzawl South, Thenzawl Kanan, Thenzawl Vengthar leh Buangpui te a huam a, hmasawnna hna thawh theihna hmun (Developable Area) chu sq. km 51.81 (60.95%) a ni. Hmalakna hmasa atan Early Bird Project hmangin cheng vbc. 4 sengin Solid Waste Management System te, cheng vbc. 8 sengin Dilpui Lake Area cheibawlna leh cheng vbc. 3 sengin Saturday Market thar siamna te chu thawh hmasak tum a ni a. Heng bakah hian cheng vbc. 23 hmangin Lau lui tuilian ven leh cheimawi hna pawh thawh tura ruahman a ni bawk.
He thutkhawm ah hian Swadesh Darshan 2.0 hnuaia cheng vbc. 99.71 senga Thingsulthliah-a Central YMA Conference Centre sak mek chu a dinhmun thlirho a ni a, he hmalakna hi MTDA leh PWD hnuaiah kalpui mek niin a hmun laihzawl leh kawng siam hna thawk tan tawh mah se, Fur ruahtui nasat avangin leivung paih leh hmanrua chawkluh a harsa a, hna a muan phah deuh nia sawi a ni.
Mizo Fiber Grid Network (MFGN) chungchang pawh he hunah hian thlirho niin SASCI Part-V (2022-23) hnuaia cheng vbc. 50 sanction hmanga Mizoram District Headquarters zawng zawng thlunzawmna tur OPGW (543 KM) leh ADSS (82 KM) hna chu ICT Department, M/S ZENICS, Ernst & Young LLP leh RailTel ten an thawk mek a. OPGW hi 24 KM zawh tawh niin ramhnuai kawng tha lo leh ruahtui vanga harsatna awmte sutkian dan leh December 2026-a zawh hman dan tur sawiho a ni.
SASCI Part-V (2024-25) hnuaia cheng vbc. 60 sanction hmanga MINECO-a sawrkar pisa hmunpui, MINECO Integrated Office Complex sak hna thawh mek chungchang pawh he hunah hian thlirho a ni a, he hmalakna hi PWD leh Buannel Geo Solution & Services ten kalpui mekin physical progress 15% thleng thawh a ni tawh a; Fur lai a nih avanga hna a kal chak theih rih loh thu tarlan a ni. Integrated Office Complex hi Commission hrang hrangte awmna tura duan a ni.
Mizoram leh Bangladesh inkalpawhna, sumdawnna kawng pawimawi tak ni tur KM 21-a thui Pukzing to Silsury kawng laih hna thawh mek pawh thlirho a ni bawk a, Chief Minister-in a ngaih pawimawh he kawng hi NESIDS (Roads) hnuaiah cheng vbc. 100.24 sengin PWD-in Intermediate Lane-a laih hna hi an thawk mek a, Physical progress 8.38% ni tawhin, Fur ruahtui vangin chak takin kalpui a harsa rih a. Zangnadawmna (compensation claim) chungchanga harsatna awmte pawh an sawiho niin he kawng hi January 2028-a zawh tura ruahman a ni.
He thutkhawm ah hian Minister K. Sapdanga, Vanlalhlana, C. Lalsawivunga, Dr. Vanlalthlana leh Lalnghinglova bakah Chief Secretary Khilli Ram Meena, Principal Secretary Sudhir Kumar leh Official te telin DC ten Online hmangin an lo zawm bawk a ni.