Mipat hmeichhiatna atanga HIV kai an tam

Mizoram-a HIV kai zinga za zela 75 vel chu mipat hmeichhiatna hman vang niin hemi atanga HIV kai zingah hian kawppui nghet, nupui/pasal nei leh ngaihzawngte atanga kai chu za zela 47.2% niin an tam ber a ni.

Intensified IEC Campaign thawh thumna neih mek puala Aizawl Vaivakawn YMA Hall-a hun hman ah Mizoram-a HIV kai zingah hian kawppui nghet nei lo, tawnchawp Sex hmanpui atanga hri kai chu za zela 44.50% an nih thu leh Mipa mahni anpui (MSM) nena Condom tel lova Sex hman vanga HIV kai chu 6.49% an ni bawk tih tarlan a ni a. IEC Campaign hun hmanpuitu Health Minister Lalrinpuii chuan, Intensified IEC Campaign chu mipui te, a bik takin Thingtlang lamah HIV chungchang zirtirna a ni tih a sawi bawk.

Health Minister chuan Intensified IEC Campaign chuan August 12 atanga October thla tawp thleng a awh dawn tih pawh sawiin, hemi chhung hian HIV chungchang uar taka puanzar leh a la hrechiang lo te hrilh hriat leh an ni dawn tih a sawi a, kuminah hian sawrkar Damdawi In chhungah zirtirna kalpui a ni dawn tih a sawi bawk a. HIV chungchang ah mahni dinhmun hriatchian hma a pawimawh a, enkawlna lak hma leh midang kaichhawng lo tura inven a pawimawh thu a sawi bawk.