Kum ruk chhungin Mizoram Police-in thubuai (case) 20,323 ziaklutin rukruk thubuai a tam hle
Zalen-in Mizoram Police thawktute hnen atanga thu a dawn danin kum ruk kalta kum 2020 atanga 2025 chhunga Mizoram Police ten BNS/IPC hnuaia thubuai an ziahluh zawng zawng 16,076 zingah hian inrawk/rukruk kaihhnawih thubuai chu a tam fal hle a, hemi kaihhnawih ah hian thubuai 11,277 ziahluh niin hei hi BNS/IPC hnuaia thubuai ziahluh zawng zawng atanga chhutin 70.14% a tling phak a, kum 6 kalta chhung khan in rawk (burglary) thubuai 5346 ziahluh niin rukruk (theft) thubuai hi 5931 ziah a ni bawk.
BNS/IPC hnuaia thubuai ziahluh tam zual dang te chu mi bum thubuai 831, mi tihnat/ kut thlak (hurt) thubuai 549 te an ni a. Police chhinchhiah danin kum 6 kalta chhung hian tualthah case 154 leh tualthah tum thubuai 98 ziahluh a ni a. Pawngsual kaihhnawih ah thubuai 146 ziahluh a niin thihna thleng lirthei chetsualna (road accident fatal) tum 426 a thleng bawk a. Kum 6 kalta chhung hian BNS/IPC hnuaiah kum 2020 kum-ah thubuai ziahluh tlem berin thubuai 1804 ziahluh a ni a, kum 2022-ah tam berin case 3699 ziahluh a ni bawk.
Local and Special Law (Non IPC) hnuaiah hian kum 6 chhung khan thubuai 4247 ziahluh a ni bawk a, heng zingah hian Zu khapna dan bawhchhiatna chu thubuai ziahluh tam ber niin thubuai 1541 zet ziahluh a ni a, hei hi Local and Special Law (Non IPC) hnuaia thubuai ziahluh zawng zawng atanga chhutin 36.28% a ni a, pahnihna chu ND&PS Act bawhchhiatna niin thubuai 1405 ziahluh a niin hei hi thubuai ziahluh atanga chhutin 33.08% a tling bawk.
Local and Special Law (Non IPC) hnuaiah hian naupang chunga hursualna kaihhnawih (POCSO Act bawhchhiatna) thubuai ziahluh pawh a tam hle a, thubuai 756 ziahluh a ni bawk a. Local and Special Law (Non IPC) hnuaiah hian kum 6 kalta chhungin kum 2020-ah thubuai ziahluh tlem berin thubuai 513 ziahluh a ni a, kum 2025-ah tam berin thubuai 852 ziahluh a ni.