Electoral Roll Observer-in Serchhip a rawn tlawh; Raltlan leh Foreigner ten E-Roll a luh an dilna pawm lo
Serchhip District tana Electoral Roll Observer leh Social Welfare, Women and Child Development Department changtu Commissioner & Secretary, Lalzarmawii ho hian Serchhip DC Bangla-ah Serchhip District-a SIR 2026 dinhmun leh Hearing kalpui dante thlirletna hi neih a ni a, Observer chuan Serchhip District-a SIR Hearing neihna ah ERO leh AERO te inpekna leh thawhrimna te a hriatpui thu sawiin, lawmawm a tih thu a sawi a. District Bawrhsap leh Election kaihhnawiha a thawhpuite zawng zawngte bakah BLO leh thawktu dang zawng zawngte chungah lawmthu a sawi a. Thawhhona tha tak nena hma la chhunzawm zel turin a chah a ni.
He thutkhawm ah hian District Election Officer Paul L. Khuma leh Election Officer Lalchhanhimi te bakah ERO leh AERO te telin Serchhip District-a Assembly Constituency pathum – 26-Serchhip (ST) AC; 27-Tuikum (ST) AC leh 28-Hrangturzo (ST) AC-a ERO leh AERO theuh ten tun dinhmuna Hearing an neih dan an tarlang a; 26-Serchhip (ST) AC-ah hearing neih ngai mi 2,318 awmin, 27-Tuikum (ST) AC-ah mi 2,266 leh 28-Hrangturzo (ST) AC-ah mi 2,470 an awm a; Form 6 hmanga Electoral Roll-a inziahluh thar dil mi 1238-ah mi 1207 te dilna pawm niin dilna pawm loh tam berte hi raltlan leh foreigner te an ni. Form 7 hmanga mitthi tawh emaw, hming paih ngai emaw dilna thehluh zat 39-ah 37 pawm a ni a, Form 8 hmanga insawn leh siamthat ngai dilna 589-ah dilna 561 pawm a ni bawk.
Heng bakah hian Corresponding deletion tih ngai mi 362 an awm bawk a, Claims & Objection hun hawn hnu leh SIR hearing neih hnua hming inziaklut zat, a pumpuia a pun belhna zat hi tun dinhmunah 1413 niin hei hi la danglam leh thei a nih thu tarlan a ni a, thla thar September 7-ah Final Electoral Roll tarchhuah a ni ang.