CM leh BRICS Entrepreneur Alliance aiawhte inkawm
Kumin August ni 7-a New Delhi Mizoram House-a Chief Minister Lalduhoma leh BRICS Entrepreneur Alliance (BEA) Global President & CEO Dr. Bhaskar Jyoti Sonowal-te inkawmna kal zelah BEA Team chuan Mizoram rawn tlawh mekin nimin khan Chief Minister Lalduhoma hovin CM Conference Hall-ah an thukhawm a, he hunah hian Chief Minister chuan Carbon Trading, Sawhthing (ginger) sawngbawlna leh Tourism-te chu Mizoram sawrkarin BEA nena thawh-dunna kalpui hmasak a duhnate an nih thu a sawi a, BEA lamin chak taka an rawn umzui avangin lawmthu a sawi a. An ruahmanna rawn siamte chu a tul ang zela bawhzui tur a nih thu a tarlang bawk a ni.
He thutkhawm ah hian BEA thawhpui Firm leh Company hrang hrangten Mizorama hma an lak theihna laite an sawifiah a, Florata Bio Complex, Russia te chuan Mizoram-a thlai tana an ‘Bio Stimulant’ siam hman tangkai kawnga hma an lak theihna an sawifiah a. Maximeyz-ten Tourism lama Mizoram phochhuah leh hmalak theihna an neih te an sawifiah bakah, Carbon Project Developer Jatin Kapur chuan Carbon Credit lama hmalak theihnate an sawifiah bawk.
Carbon Credit chungchangah hian Carbon tihtlemna (carbon-removal projects) te, Afforestation & Reforestation (ARR) te, Blue Carbon, BECCS leh Biochar-te sawifiah a ni a. Thingtlang mite tana eizawnna siamsak te, Carbon leh Private investment hmanga sum leh pai tam tham tak Mizorama lakluh a nih theih dante pawh sawilan a ni.
Khualzin hip kawngah hian Mizoram chu Goa, Kerala leh Kashmir ang State hmingthang sa te nena inel lovin, thil thar hmuhchhuah leh tawn thar (experience-led destination) lamah nasa zawka hmalak a that an ring a. Sum ngah zual (High-Net-Worth Urbanites), Corporate & Tech lama thawk te leh Gen Z khualzinte a tam thei ang ber hipluh (target segments) tum zawnga hmalak theih niin an ngai a ni.
Heng bakah hian Isreal Company atangin Micro Drip Irrigation leh Climate Control Green House te, Drone Enable Logistics bakah Security lama hma an lak theihnate an ngaithla bawk a. Sawhthing sawngbawl leh a hralhna tur market chungchang pawh sawiho niin, International Market-a hralh theih dan tur te an sawi a ni.
Nimin-a thutkhawm ah hian Horticulture Minister C. Lalsawivunga, EF&CC Minister Lalthansanga, Cooperation Minister PC. Vanlalruata, Rajya Sabha MP K. Laltluangkima, Adviser to CM Lalmuanpuia Punte, Adviser to CM Dr. KC Lalmalsawmzauva leh Official dangte an tel a ni.