Civil Hospital, Aizawl-ah khawl thar bun

Health Minister Lalrinpuii’n Civil Hospital, Aizawl thuamthat mek a ni tih sawiin, damlote tan malsawmna a thlen ngei a beisei tih a sawi.

    Social Media kaltlanga he thu hi sawiin Health Minister Lalrinpuii chuan USG khawl chhuak thar ber - Samsung RS 85 chu Civil Hospital, Aizawl a hman tur tihfel a nih thu leh cheng nuai 100 chuang man a nih thu sawiin, hmasawnna thar chuan damlote malsawmna thlen ngei se a duh tih a sawi a. Khawl thar hi Ultrasound khawl tha bik niin a hman tangkaina ber chu Radiology, General Imaging leh taksa chhung hmuhchhuah harsa en nan a ni tih a sawi a, khawl chuan Thin (liver), Kal leh Pumpui chhunga natna hrang hrang fatty liver thlengin fiah takin a thlalak a la thei a; hnute bawk (breast cancer) leh thyroid thil lo awm te a hmuchhuak thei tih sawiin, thazam te tak te chhunga thi kal dan thlengin chiang takin a en thei tih a sawi a, khawl chu bun nghal niin tangkai taka hman anih a beisei thu a sawi a ni.