B. Lalthangliana thil hlui vawn that te Govt. Hrangbana College kutah hlan a ni
Hrangbana College-a kum 24 chuang lo thawk tawh leh he College-a a thawh chhunga Mizo thu leh hla tihhausak leh tihhmasawn nana sulhnu ropui tak hnutchhiahtu B. Lalthangliana chuan nimin-a hun hman ah hian Mizo history zirchiang tura bul a tan dan te sawiin, thu leh hla leh culture nena inzawm thil hlui leh thil hlu a lo lâkkhawmte chu uluk zawka vawnthat a nih zel theih nan Govt. Hrangbana College Archive hnenah phal takin a pe tih a sawi a. He College-a a thawh chhunga Principal te leh a thawhpuite'n an phûrpui thin avanga sulhnu nei ve thei a ni chu vannei a intihzia leh lawmawm a tihzia a sawi bawk.
Heng thil hlui pawimawhte inhlanna lehkha chu B. Lalthangliana chuan Associate Professor leh Archive Committee Chairman H. Lalthanpuii hnenah a hlan a, he hunah hian B. Lalthangliana te nupa bakah College Principal, Vice Principal, Mizo Department zirtirtute leh zirlai thenkhatte an tel a ni.
MAL Book of the Year chawimawina tum hnih lai lo dawng tawh B. Lalthangliana pual Corner-ah hian Mizo tawng, Kâwl tawng leh Sâp tawng thlenga inziak Mizote tana document pawimawh tling thei tur, tun huna hmuh tur leh lei tur pawh awm tawh lo lehkhabu hlu tak tak bakah a lehkhabu kut ngeia a ziah engemaw zat dah a ni a. A tul ang zela tihlen tura ruahman a ni bawk. Heng document-te hi History, Culture leh Literature huanga research ti te tana hmanraw tangkai thei tur a nih angin Govt. Hrangbana College zirlaite leh thawktute bakah a duh apiang tan hman tangkai theih a ni ang.
B. Lalthangliana hi June 16, 1953 khan Khawbung South-ah a piang a, kum 1959-a Mautam lo thleng tur avangin kum 1955 khan an chhungkua in Burma-ah an pem a, zirna lamah hnuhma tha tak tak neiin kum 1985 thleng khan Mandalay University-ah a thawk nghe nghe a. Mizoram-a a rawn chhuk hnuah Pachhunga University College leh Hrangbana College-ah thawk kawpin Hrangbana College-ah hian a thawk nghet zui a, Associate Professor in a pension a ni. Kum 1989 khan ‘Ka Lungkham’ tih lehkhabu vangin ‘Book of the Year’ hmasa ber a dawng a, heng bakah hian chawimawina hrang hrang pawh a lo dawng tawh bawk a, Mizo Historian zinga kutchhuak ngah ber te zinga mi a ni.