Vanapa Hall & Park Architectural Design lawmman semna Chief Minister hovin hman a ni
Aizawl-a Assam Rifle ram chhuahsana hmalakna kal mekah Nodal Department, UD&PA Department chuan ‘Vanapa Hall & Park Architectural Design’ atan hian intihsiakna buatsaihin nimin khan Aizawl-a I&PR Mini Theatre-ah Chief Minister ho hian lawmman semna hi neih a ni a, inelna hi kumin March ni 17 khan neih tan niin Firm 33 an tel a, an zingah hian State pawn lam firm te pawh telin thehluh hun tura huntiam May 15, 2026 khan Firm 16 in an Design an thehlut a, an zinga 14 chu pawm a ni a. Endiktuten endikna chi hrang hrang an kalpui hnuah a titha zual firm paruk (6) an thlang leh a, chung mite chuan an Design chu endiktute hmaah sawifiahin, Catalyst Architecture Studio chuan lawmman pakhatna an dawng a, a neitu Lalrinzuala Ralte hi ‘35th JK Indian Architect of the year 2026’ dawngtu niin nimin-a lawmman semna ah hian Hall & Park design hi a lem nena entirin a sawifiah bawk a ni.
Nimin-a lawmman semna hunah hian Chief Minister Lalduhoma chuan Aizawl hi a tirah Sapho ten an thiam ang angin lo Plan tih sawiin, mahse ziaka inhnutchhiah engmah a awm loh thu leh Zalenna kan hmuh hnuah a tlachawp zela ngaihtuah chungin kan luah chho ta tih a sawi a, “Hma kan sawn zel a, a hunlaia kawngpui zau tawk tak nia kan ngaih kha tunah chuan a lo zau tawk ta lova, Hall lian tham tak nia kan ngaih kha an lo te ta a, kawngpui zau zawk te, puipunna hmun tha zawk te, Park nuam takte kan mamawhna a lo sang ta a ni,” tiin “Aizawl laili a Assam Rifle luah ram chu Pathian zarah mipui kuta a lo awm ta a. A hman dan tur ngaihtuahtu tur Advisory Committee, mipui zawng zawngte aiawh zo kan din a, hmalakna tur a duang a, Master Plan a siam a, chung zingah chuan Vanapa Hall thar sak hi a tel,” a ti a ni.
Advisory ruahmanna te hi ram danga khawpui mawi tak takte mitthla chunga rual elna thinlung pu-a kan ram hmel lanna tur, kum tam tak lo la awm tur thlenga kan tangkaipui tur ngaihtuah chunga kalpui a ni tih Chief Minister chuan sawiin, “Vanapa Hall & Park pawh hi khawpui laili taka awm tur, puipunna hmun langsar ber tur a nih angin; mawi si, tha si, him si nise kan duh a. Miin Aizawl an mitthla ruala an mitthlaa lo lang ve nghal tur Centre mawi tak sak kan duh a ni,” tiin chutiang atan chuan he inelna pawh hi buatsaih a nih thu a sawi bawk.
He hunah hian UD&PA Minister K. Sapdanga pawhin Aizawl hmel thar, changkang tak, mipuiten an hman tangkai tur, miten an tlawh chak em em tur sawrkarin a duang mek tih sawiin, “A taka chantir thuai kan tum a ni,” a ti a. He hunah hian Lalengzuali, Chief Architect, PWD chuan endiktute aiawhin endikna an kalpui dan tlangpui sawifiahin, “Intihsiakna hi Council of Architecture duh dan mila kalpui a ni,” a ti bawk.