Tribal Pride Gardens siam dan a hmunah an enfiah

EF&CC Minister Lalthansanga chuan nimin khan Tribal Research Institute & Ropuiliani Freedom Fighters Museum, Kelsih-a Tribal Pride Gardens siam dan tur a hmunah a enfiah.

    Sawrkar laipui chuan kum 2021 atang khan Birsa Munda piancham November ni 25 chu Janjatiya Gaurav Divas atan a hmang a, hemi ni denchhen hian India ram pumah ‘Birsa Munda Janjatiya Gaurav Upvan’ din tura ruahman a ni a. Mizoram sawrkar pawhin he programme hi bawhzuiin Tribal Research Institute & Ropuiliani Freedom Fighters Museum, Kelsih-ah hian Tribal Pride Gardens siam turin hma ala mek a ni. Helai hmunah hian Art & Culture Department bultumin Horticulture Department leh EF&CC Department te nen Tribal Pride Gardens hi an buatsaih anga, Mizorama tualto thing leh pangpar te a tam thei ang ber chin tura ruahman a ni a, a ram tichhe zawng ni lovin a ram leilung ti hausa leh ram hrang siam belh zawk tura ruahmanna hi siam mek a ni.