Zuchhip khaw hmun hlui lungphun hawng

Food, Civil Supplies & Consumer Affairs (FCS&CA) Minister B. Lalchhanzova chuan nimin khan Zuchhip khaw hmun hlui lungphun hawngin Aizawl Municipal Corporation Executive Corporator Christina Roluahpuii Sailo chuan khual zahawm niin a hmanpui bawk a ni.

Nimin a lungphun hawnna hunah hian Minister B. Lalchhanzova chuan Zuchhip khawchhuak thlah a nih thu tarlangin, Zuchhip khawchhuak thlah kalzel ten Zuchhip khua hre reng chunga an pi leh pute lunghahna hmun an cheibawla roh taka an enkawl chu ropui a tih thu a sawi a. Mahni pi leh pute khaw-chhuahna hmun chu zahpui lova kan hriatreng hi a pawimawhin, malsawmna dawnna a nih thu a sawi a. Helai hmuna ruihhlo ngaite enkawlna tur Chhanchhuahna Home din a ni chu tha a tih thu sawiin, an inenkawl dan leh Home-a awmte pawh intodelha mahni ei tur an thawkchhuak thei chu chhinchhiahtlak a tih thu a sawi bawk.

He hunah hian Khualzahawm Christina Roluahpuii Sailo pawhin kalkhawmte hnenah Zuchhip khawchhuak AMC Corporator an neih thu sawiin, Zuchhip khaw mipuiten Aizawl-ah Zuchhip khawchhuak thlenna an nei a ni tih hriaa, harsatna an neihte pawh a hnena thlen hreh lova, a theih ang anga a lo puih tur thu a sawi bawk.

Zuchhip Hmun Hlui Humhalhtu Pawl hi kum 2019-ah din a ni a. An hmalaknain Zuchhip hmun hlui huamchhunga lungdawh leh thlan awmte humhalh a ni a, ruihhlo ngai mi 34 enkawl theihna tur ‘Chhanchhuahna Home’ chu kum 2020 khan din niin mi 32 leh rawngbawltu mi 10 an awm bawk a ni. Hei bakah hian PHE Department, Zuchhip VC leh Khawzawl BDO-te puihnain tui dahkhawlna tur Water Tanky an nei a, P&E Department puihnain Transformer an nei bawk a ni.