State Level Orientation on VB:G RAM G chu RD&AD Minister hovin neih a ni

Kumin July 1 atanga hman tan tur Viksit Bharat: Guarantee for Rozgar and Ajeevika Mission (Gramin) chungchang ah nimin khan State Level Orientation neih niin he hun hi Rural Development and Administration Department Minister Prof. Lalnilawma chuan khuallian niin a hmanpui a ni.

Aizawl-a I&PR Conference Hall, Lianchhiari Run-a State Level Orientation on Viksit Bharat: Guarantee for Rozgar and Ajeevika Mission (Gramin) [VB:G RAM G] ah hian RD&AD Minister Prof. Lalnilawma chuan VB:G RAM G chu mipuiten hlawk taka an chhawr ngei a duh tih sawiin, kum 2 chhungin Ministry of Rural Development-in ni 100 daih inhlawhna ‘Labour Budget’ chu an pawm tawh thu leh kumin ah chuan ‘Normative Allocation’ hmanga pawisa hi pek tur a nih avangin Labour Budget approach-in a kal lo thung tih a sawi a. VB:G RAM G thiltum pawimawh tak chu India ram pum huapa hmasawnna ngelnghet neih a ni tih sawiin, Viksit Bharat@2047 atana mitin te leh Department hrang hrangte inpuahchah nasat a ngaih thu a sawi a. Thingtlang khawtin te pawh mahnia intodelh tura theihtawp chhuahin ke pen zel a pawimawh thu leh he hmalakna kawng atana pawimawh tak chu hnathawh inthlunzawmna (convergence) niin, Department hrang hrang atanga hnathawhte chu convergence-nen tha taka kalpui a nih theih ngei a beisei thu a sawi a. VB:G RAM G atana State Matching Share pawh Finance Department-ah dil mek a nih thu a sawi bawk.

VB:G RAM G hi July ni 1, 2026 atangin India ram pumah hman tan tur niin chumi atana inbuatsaihna kal zelah State Level atanga Village Level thlengin Orientation leh Public Outreach (Jan Samvaad) neih mek zel a ni a. Mizoram-ah pawh inbuatsaihna nasa taka kalpui niin The Mizoram VB:G RAM G Scheme, 2026 chu Council of Ministers-in a pawm hnuah chhuah a ni a. India rama VB:G RAM G Scheme kalpui dan tur chhuah hmasa ber State a ni. VB:G RAM G hnuaia ni 60 chhung chawlhna (seasonal pause) chungchang pawh Mizoram chuan ruahmanna leh hmalakdan tur a lo duang tawh bawk a. Seasonal Pause chhung hian VB:G RAM G-a hna reng reng thawh phal a ni lo a, thingtlang miten Buhtuh leh Buhseng laia anmahni leh midang hnena an inhlawh theihna tura Seasonal pause hi duan a ni.

Nimin-a State Level Orientation on VB:G RAM G hi Rural Development and Administration Department-a Addl. Secretary V. Lalengmawia chuan kaihruaiin MGNREGA leh VB:G RAM G chungchang PowerPoint presentation hmanga zirhona leh sawihona neih a ni a. He hunah hian Sawrkar Dept. aiawhte bakah All Mizoram VC Association hruaitute leh Mizoram Journalists Association (MJA) Member-te an tel a ni.