Raltlan te Biometric Enrolment lak chawlhsan rih a ni
Home Department hotute sawi danin Chhiarpui leh Electoral Roll Special Intensive Revision (SIR) buaipuia Mizoram District tina sawrkar hnathawkte an buai vanglai a nih avangin raltlante Biometric Enrolment kalpui hi tih hleih theih a ni lova. Chawlhkar hmasa lam atang khan a dinhmun hi a la ngai deuh reng tih an sawi a. Myanmar atanga raltlan mi 29,727 zinga raltlan mi 29,047 te Biometric Enrolment chu zawh a ni tawh a, hei hi za zela 97.71 a ni a. District 11 zinga District 6 – Aizawl, Champhai, Lunglei, Mamit, Khawzawl leh Saitual District-te chuan an zofel tawh a. Serchhip District-ah za zela 99.86 an zo tawh a, Kolasib District-in za zela 96.15 zo tawhin Lawngtlai District pawhin za zela 95.83 an zo tawh a ni. Myanmar raltlan awm tam ber palina, raltlan 3,075 awmna Siaha District-ah za zela 88.62 chauh an la zo a, raltlan 622 chauh awmna Hnahthial District-ah za zela 90.51 an zo tawh bawk a ni.
Bangladesh raltlante Biometric Enrolment pawh zawhfel hnaih a ni tawh a. Zirtawpni thleng khan Bangladesh atanga Mizorama raltlan mi 1,482 zinga 1,447 te Biometric Data chu khawn a ni tawh a, hei hi za zela 97.64 a tling tawh a ni. Bangladesh-a Chittagong Hill Tracts atanga raltlan lo lut awm tamna ber Lawngtlai District-a awm mi 1,164 zinga mi 1,129 (za zela 96.99) te Biometric Enrolment tih tawh a ni. Bangladesh raltlante hi Serchhip District-ah 235, Lunglei District-ah 75 leh Aizawl District-ah 7 an awm ve a, anniho Biometric Enrolment hi tihfel a nihna a rei tawh a. Lawngtlai District hi Myanmar raltlan awm tam berna dawttu a nih bawk avangin hna a kal chak thei lo ni a thudawn a ni.