Cooperation Minister in MIZOFED Assembly a hmanpui

Mizoram State Cooperative Marketing and Consumers Federation Ltd. (MIZOFED) chuan nimin khan Annual General Assembly vawi 28-na hmangin he hun hi Cooperation Department changtu Minister PC. Vanlalruata chuan khuallian niin a hmanpui a ni.

Dawrpui Multipurpose Centre-a MIZOFED Annual General Assembly-ah hian Cooperation Minister PC. Vanlalruata chuan MIZOFED inkhawmpui lian vawi 28-na a hmanpui thei chu lawmawm a tih thu sawiin, kum 2025-26 chhunga MIZOFED Annual Report tarlan anga Rs. 9,77,06,787.15 (provisional) lai mai hlawkna (net profit) an tel thei chu hma an sawnzia tilangtu a ni tih a sawi a. Sawrkarin kuthnathawkte a ngaihpawimawhzia sawiin, sawrkar flagship policy kalpui mekte mila Cooperative Society-te nen thawhhona tha zawk an neih theih a beisei thu leh heng atan hian sawrkar chuan Society-te chu thawhpuia chawikan theihna apianga chawikan a inhuam reng thu a sawi bawk.

Mizoram Cooperative Societies-a Registrar John L.T. Sanga pawhin Cooperative Society-te chu chhawmdawl leh chawikan a pawimawh thu sawiin, India State danga Cooperative Society-te changtlunzia leh an hlawkna tel dan entawnin Mizoram pawh kan inzir ve thei tih a sawi a. MIZOFED pawh hmasawn zel turin a duhsak thu leh an Output (dehchhuah) tipung zela Mizoram tan rawngbawl zel turin a chah a ni.

MIZOFED hi Marketing & Consumer Federation a nih angin sumdawnna a khawih ber a, tunah hian Petroleum Oil Lubricants (POL) leh Liquefied Petroleum Gas (LPG) bakah Essential Commodities & Consumer Goods (E&C) sumdawnna ah hma an la ber a. He hunah hian kum 2025-26 chhunga MIZOFED sumdawnna hlep leh hloh dinhmun Head Office-in a chhutchhuah chu tarlan niin Rs. 9,77,06,787.15 lalut anga chhut a ni a, hei hi Audit hma a ni thung.