Chief Minister in All India Radio chu Zo hnahthlak insuihkhawmna hmanraw pawimawh tak a ni tih a sawi

All India Radio (AIR) in kum 90 a tlin lawmna chu nimin khan Aizawl-a Vanapa Hall-ah neih niin he hun hmanpuitu Chief Minister Lalduhoma chuan All India Radio chu Zo hnahthlak insuihkhawmna hmanraw pawimawh tak a ni tih sawiin, AIR chu Mizo tawng hman dik chungchangah a entawn tlak hle tih a sawi.
All India Radio-in kum 90 a tlin lawmna Vanapa Hall-a neih ah hian Chief Minister Lalduhoma chuan All India Radio chu kum 90 chhung India mipuite awi tleitu ber a ni tih sawiin, “A hlutna chu a din atanga tun thlengin mipui thinlungah ala ngai reng,” a ti a, AIR programme hrang hrang chu thenawm ram leh State tan a tangkai hle tih sawiin, Zo hnahthlak insuihkhawmna hmanraw pawimawh tak anih thu a sawi a. All India Radio chu ramchhunga mai bakah khawvel huapa Radio Network lian ber a ni tih pawh sawiin, Tawng hrang hranga thupuang darh tam ber niin tawng chi hrang 23 leh chibil tawng (dialect) 146 chuang ngaihthlak theih a nih thu leh ram 100 chuangah All India Radio chu ngaihthlak a ni tih a sawi a. “Kum 2024-ah Oxford University-a Reuters Institute for the Study of Journalism in Digital News Report 2024 a tihchhuah ah India ram puma News Channel lian hrang hrang chu zirchiangin Akashvani News chu India ramchhunga News puanchhuahna rintlak ber a ni,” a ti a. AIR chu Mizo tawng hman dik chungchangah a entawn tlak hle tih pawh sawiin, tawng humhalh kawngah a thawhhlawk thu leh Mizo hun hmasaa thil thleng pawimawh hrang hrang vawnghimtu a ni tih a sawi a. All India Radio Aizawl Station chu kum 1966 July ni 31-a din a ni tih sawiin, rambuai laiin AIR chu mipuite thleng phak chanchinthar puangtu pawimawh tak a nih thu a sawi bawk.

AIR kum 90 tlin lawmna ah hian Akashvani Director leh Mizoram Cluster Head DR. Lalropuia chuan inlawmna thu sawiin, AIR Artist hrang hrang zai ngaihthlak a ni a, Radio kum 90 zinkawng Documentary thlirho anih bakah All India Radio Station-a vawi 100 chuang thu sawi tawh te chawimawina hlan an ni bawk.

Kum 1936 April 1 khan ‘Indian State Broadcasting Service’ tia bul tanin June 8, 1936-ah ‘All India Radio’ tih hming vuah leh a ni a, kum 1957 khan ‘Akashvani’ (Voice from the sky) tia thlak leh niin ramchhungah Station 59 a nei mek a, AIR Aizawl Station chuan kumin hian kum 60 a tling ve chiah bawk a ni.