Sawrkar in ruang phurh a kalpui mekah ruang 2144 phurh nan cheng nuai 225.83 pek a ni tawh

Mizoram sawrkarin khualkhuaa thite ruang phurh man a tumsakna, 'Assistance for Transportation of Bodies of Deceased Persons within Mizoram' kaltlangin ruang 2,144 phurhna man cheng nuai 225.83 pek a ni tawh.

Ruang phurh man buaipuitu Social Welfare Department hotute chuan Akashvani News Aizawl zawhna chhangin, ruang phurhna senso sawrkarin a tum sakna hi kum 2024 September thla khan hawn a ni a, hemi kum vek December thla atangin ruang phurh man hi pek tan niin tun thlengin ruang 2,144 phurhna senso atan cheng nuai 225.83 pek a ni tawh tih an sawi a ni. Social Welfare Department hotute chuan ruang phurhna hi sawrkarah online hmangin ‘Ruangphurh App’ kaltlanga dil theih a nih hnuah online hmanga dil zinga 34 hnenah ruang phurhna senso hi pek a nih tawh thu leh tunah hian dilna lut tawh pawisa pekchhuah tura buaipui mek engemaw zat an la neih thu an sawi a; a tahtawl tê tê a pekchhuah a nih dawn thu an sawi bawk.

Mizoram sawrkar chuan ruang phurhna senso tur hi kum 2024-2025, 2025-2026 leh 2026-2027 atan Budget-ah cheng nuai 500 theuh a dah a; ruang phurh inkaihhruaina in a tarlan danin ruang phurh tur chu a thlenna km 20 aia hnai a ni tur a ni lo a, km 20 piah lamah chuan tu tan pawh hman theih niin, lirthei thlen theih chin a huam a ni. Inkaihhruaina-a tarlan a nih danin Ruang phurhna motor hman man diltuten thla khat chhungin dilna chu (application form siamsa angin) Director, Social Welfare &Tibal Affairs hnenah emaw, an District chhunga District Social Welfare hnenah emaw an thehluh tur a ni a, an motor hman man chu Sawrkar – in rate a siam angin a rul let dawn a ni.

Ruang phurh man diltute chuan kim takin report form an fill-up tur a ni a; Damdawi In-a thi a nih chuan Death Certificate pangngai emaw, a thihna hmun damdawi In-a Doctor-in a thi a ni tih a ziahna (Declaration of death by the Medical Officer) thehluh tur a ni a. Damdawi In-a thi a nih loh chuan dilna form-a sawilan angin Declaration thil tel tur a ni a; motor hmanna receipt original copy te, mitthi Aadhaar Card/Voter ID photocopy thil tel tur niin, kumtling lo a nih erawh chuan a nu leh pa emaw, a chhungkhat hnaivai te Aadhaar Card/Voter ID thil tel tur a ni a. Document kim lo chu an dilna pawm a ni dawn lo thung a ni.