PTS a hmasawnna ruhrel thar Home Minister in a hawng

Police Training School (PTS), Thenzawl-a hmasawnna ruhrel din thar hrang hrangte chu nimin khan Home Minister K. Sapdanga chuan a hawng.
Assistance to States & UTs for Modernisation of Police (ASUMP) Scheme hmanga Mizoram sawrkar puihna a tih hlawhtlin hmasawnna chi hrang hrang an hawn te hi PTS Gatepui siam thar te, Digital Lab, Indoor Gymnasium leh Indoor Firearms Training Simulator te a ni a, a hawnna puala hun hman ah hian Home Minister K. Sapdanga chuan Police Department in ‘Year of Discipline’ programme thar a kalpui chu hêng hmalakna thar te hian nasa taka a tanpui a beisei thu a sawi a. Police hnaah Discipline, Professional conduct leh Physical fitness te a pawimawhzia sawiin, PTS-a Training Standard a tihsan lehzual tur thu a sawi bawk a. 70th Batch Recruit Constable trainees-te lakah pawh beiseina sang tak a neih thu sawiin, trainees-te chu taksa chak leh discipline tha chu an hmalam hun atan a pawimawh thu a sawi bawk.

Nimin-a hawn tak heng hmasawnna chi hrang hrangte hi Mizoram Home Minister leh DGP te hmalakna avanga neih niin a hun takah hna zawh theih anih thu Mizoram Police chuan an sawi a. PTS Main Gate thar hi sum awm remchang ang ang hmanga sak niin mi dang ruai lova PTS-a thawkte leh training laite’n an sak a ni a. Police Training tih tunlai (modernize) zelna atan Digital Lab. nei tharin Computer Set 20 lenna a ni a. Hei hian Computer zirna tihchangtlun, Digital Learning leh ICT-Enabled Training atan nasa taka a puih beisei a ni.

Police Training lai ten dik tak leh him zawka silai khawih leh kah an zir theihna tur Firearms Training Simulator thar pawh din a ni a. He Simulator-ah hian AK-47, INSAS, Glock pistol leh silai dangte a rualin a kah theih aa. Taksa tihchaka vawn hrisel nan Gymnasium siam thar siam a ni bawk a. Building awmsa siam that niin Gym bungraw thar changkang tak tak dah thar a ni bawk.