Lunglei-a UD&PA Department hmalakna thlirho

Urban Development & Poverty Alleviation (UD&PA) Department Director Jacob Lalawmpuia leh Lunglei Municipal Council (LMC) hotute chu nimin khan LMC BoC Hall-ah thukhawmin Lunglei khawpui chhunga UD&PA Department hmalakna hrang hrang an sawiho.

Nimin a thutkhawm hi LMC Chairman Lalzuithanga chuan kaihruaiin Lunglei khawpui bawlhhlawh paihna hman mek atanga bawlhhlawh leh meikhu chhuak thinin Hauruang leh Sazaikawn khawtlangte tana harsatna a thlen thu tarlan niin, UD&PA Department leh LMC hotute chuan hei hi pawi an tih thu leh chinfel vat theih an beisei thu an sawi a. He harsatna hi tihtawp leh chinfel a nih theih nana hmalak dan tur sawiho in, he harsatna hi pumpelh turin felfai taka bawlhhlawh sawngbawlna hmun thar tur, Solid Waste Management Centre chu zawhfel tep a nih thu leh Centre-a khawl hman turte pawh ngaihtuah mek a nih thu tarlan a ni.

Thutkhawm zawhah hian Lunglei Solid Waste Management Centre-I sak mek leh Lunglei bawlhhlawh paihna hmun chu tlawh nghalin Bawlhhlawh inchhekkhawm sa buaipui dan tur enho a ni a, Legacy Waste Remediation Project chu a hma thei ang bera kalpui a nih theih nan bawlhhlawh paih lailawkna hmun tur enfel nghal a ni bawk.