Chhiarpui neih a ni dawn

Kumin April 1 atang khian India ramah Chhiarpui neih a ni dawn a, sawrkar chuan rampum chhiarpui thawh khatna tura hriattirna a tichhuak tawh a ni.

In tin tlawh chhuaka chenna In awm zat endikna, House to House Listing hi kumin April ni 1 atanga September ni 30 inkar chhungin ramchhunga State leh UT ah te kalpui tur a ni a. State leh UT te tan ni 30 theuh abika hun ruat a ni ang. Tun tum chhiarpui hi digital hmanga kalpui vawikhatna tur a ni a. Mobile application hmangin data pawimawh lakkhawm a ni dawn a. Chhiarpui-ah hian buaipuitu tur mi nuai 30 vel in ruahman a ni a. Enumerators, Supervisors, Master Trainers, Charge Officers leh Principal or District Census Officer ten data lakkhawm leh vil hna hi an thawk dawn a ni. 

Tarlan tawh angin chhiarpui hi thawh hniha neih tur a ni a. Thawhkhatna ah hian House Listing leh Housing Census neih a ni ang a. Thawh hnihna ah hian kum 2027 February thla chhungin mipui awm zat chhiarna Population Enumeration (PE) neih a ni ang.