Tuiluankawr siam nan cheng vbc. 103 dawn a ni

UD&PA Minister K. Sapdanga chuan tuiluankawr siam nan UD&PA Department chuan Sawrkar laipui atangin SASCI hnuaiah cheng vbc. 103 an dawn thu a sawi.

ZPM Party in nimin-a chhung Inkhawm an neih ah Minister K. Sapdanga chuan Aizawl khawpui leh District hrang hranga harsatna lian tak kan tawh, leimin chhiatrupna laka ven beihpui thlak nana tuiluankawr siam nan UD&PA chuan Sawrkar laipui atangin SASCI hnuaiah cheng vbc. 103 an dawn thu sawiin, Aizawl khawpuiah cheng nuai 6,100 ruahmanin hmalak chhoh mek a nih tawh thu leh cheng nuai 4,200 chu District dangah thawh a nih tur thu a sawi a, “Leimin siamtu ber tuiluankawr kan neih that loh avangin hei hi kan ngai pawimawh takzet a ni,” tiin, “Chhungkaw tinten kan Choka leh tui khawihna atanga tui kan paihchhuah danah tui luankawr tha tak kan neih theuh a ngai. Heng tui luangkhawm zawng zawng hi tuiluankawr lian zawkah a luangkhawm anga, chumi kal zel atang chuan tui thianghlim zawk hman theih siam chhuah leh kan tum a ni,” a ti.

Home Department changtu ni bawk K. Sapdanga chuan venghimtu Police an lak danah tunhma khan dik tawk lo tam tak a awm nia a lan thu pawh sawiin, “Tunah hian dik leh tha zawka Department kalpui a, Police lak dan pawh dik taka kalpui mek zel a ni. Police kan lak dan a dik tawk a ni ang, tunah chuan India ram pumah Mizoram Chief Minister chuan fak a hlawh phah der tawh a ni. Chu mai ni lovin Home Department hnuaia Departmental Exam kan buatsaih pawh a dik tawk a, a tling zo lo ten dik taka kalpui a nihzia an hre zawk ang,” a ti a. “Ruihhlo lo luhna kawnga awm kan ni a, a kalkawnga khaw 20 chuang he ruihhlo do beihpui min thlakpui tur hian kan thlang a, tunah hian rim takin Department mite nen an thawk mek a ni. He beihpui thlakna hian nasa takin ruihhlo a tikiam a, tunah phei chuan kan Police-ten Delhi tlang thlengin he lama inhnamhnawihte zuk umin an man hial a ni,” a ti bawk.

Aizawl khawpui chhungah pawh September 1 atang khan Central YMA-te nen thapui an thawh thi Home Minister chuan sawiin, “Krismas hunpui lo thleng tur pawh him leh nuam takin kan hmang thei turah kan ngai. Kuhva smuggling hi he sawrkar hian theihtawp in a do zel dawn a. He ramchhunga kuhva chingtute lamah sawrkar a tang zel dawn bawk. Kuhva chinga eizawngten tunah chuan an thawhhah man an hmu chho mawlh mawlh mek hi kan lawm takzet a ni,” a ti a. “ZPM sawrkar hian inthlan hma khan Kalphung Thar kan zuar a, inthlan kan hmachhawn leh hunah chuan vote zawn nan kalphung thar kan hmang tawh lo ang. Kan inzawrhna ang ngei khan hna kan thawk em tih hi kan inzawrhna tur a ni. Mizoram mipuite hian term khat chauh ni lo, term tam tak he ram rawngbawl hna thawk tur hian min duh ngei dawn a ni,” a ti bawk.