Serchhip-ah Bawrhsap hovin Naupangte Ni hman a ni

Nimin November 14, 2025 kha ‘Naupangte ni - Children's Day’ niin ramchhung hmun hrang hrangah he ni pual hian hun hman a ni a, Serchhip ah pawh Sub-Hqrs. YMA Hall-ah Naupangte enkawlna hmuna awm mekte pualin he ni hi hman a ni.
District Child Protection Unit (DCPU) leh District Hub for Empowermnet Womens (DHEW), Womens & Child Development Serchhip ten Serchhip-a naupangte enkawlna hmun pathum a awm mek te puala Naupangte ni puala hun an buatsaih hi District Bawrhsap Paul L. Khuma chuan hmanpuiin Naupangte ni-ah heng naupang te puala hun buatsaih nachang an hriat avangin he Programme buatsaihtu, DCPO leh a thawhpui te bakah DHEW-a thawktute chungah lawmthu a sawi a. Bible-a Isua leh Josepha chanchin kan hmuh atanga naupangte tana hriat tur pawimawh hrang hrangte sawiin, Pathian tihna leh thuawihna avanga an dinhmun chawisan a nih thu a sawi a, kawng engkim ah Pathian thu nen theihtawp chhuah zel tura naupang enkawltute chu chahin, naupangte hlutna kan hriat thar zel a pawimawh thu a sawi bawk.

Nimin-a he hun hman hi District Child Protection Officer (DCPO) R. Lalramdinmawii chuan kaihruaiin Serchhip-a naupangte enkawlna Home 3- Unity Orphange Home, Zoar Deprive Children’s Home leh Observation Home-a awm mek naupangte leh Home-a thawktute an tel a, Child Welfare Committee (CWC) a thawk te pawhin he hun hi hmanpuiin he hunah hian Home a naupang ten an thiam thil chi hrang hrang entirin intihhlimna hun hman chhunzawm a ni bawk.

‘Naupangte ni-Children's Day’ hi India ramah chuan Prime Minister hmasa ber Jawaharlal Nehru pianchampha denchhenin November 14-ah hman thin a ni a, Serchhip-ah chuan nimin a hun hman a nih bakah hian November 18-ah ‘Children Empowerment Summit’ neiin November 19-ah ‘Children's Carnival & Book Fair’ te neih leh tur a ni ang.