Red Bull Aizawl Tlang Ruam 2025 nei leh dawn

Sports & Youth Services Department changtu Minister Lalnghinglova Hmar chuan nimin khan a Pisa-ah ‘Red Bull Aizawl Tlang Ruam 2025’ (Urban Downhill Racing) neih tur buaipuitu Red Bull aiawhte leh Mentor pahnih - khawvel huapa Mountain Biker langsar - Tomas Slavik leh Pedro Burns te a kawm.

He inkawmna ah hian Minister chuan Mizoram chhungah ngei khawvel huapa inelna lian, thirsakawr intlansiak hmuhnawm leh rothap kan thleng leh thei tur chu lawmawm a tih thu sawiin, “Red Bull zarah Mountain biking lama khawvela langsar, World Class infiammi kan hmu thei dawn a ni,” a ti a. “He inelna hian khawvel hriatah Mizoram a tilar a, tunah pawh inelnaa tel tur leh a entu turten Aizawl Hotel an luah khat deuh vek tih thu ka dawng a, a lawmawm takzet a ni. Sports leh tourism hi thil kalkawp tlat a ni a, Mizoram sawrkar chuan a theihna apiangah puih zel a inhuam,” tiin Red Bull India aiawhte chuan Mizoram sawrkar puihnaah lawmthu an sawi a ni.

Red Bull Aizawl Tlang Ruam hi nikum October 26 khan a vawikhatna’n Upper Republic atanga Hawla Indoor Stadium inkarah hlawhtling taka neih a lo ni tawh a. Kumin hian Vawiin, November 8 (Inrinni)-ah neih tur niin, nikum aia lian zawk, a kawng pawh thui zawk leh harsa zawk turin Upper Republic atanga ITI Veng thleng duan a ni a. Khawvel hmun hrang hrang atang leh India ram State hrang hrang atangin Mountain biker tha engemaw zat an inel dawn a ni.

He hunah hian UCI Four-Cross World Champion vawi li ni tawh Tomas Slavik chuan kum hmasa lama Red Bull Tlang Ruam event neih chu a hlawhtling tih sawiin, khawvel hmun hrang hrang atang Aizawla inelna an neih ang chu neih ve duh an tam phah hle tih a sawi a. He inelna chhim tura lo kal an tam a, an pun belh zel theih tur thu a sawi ve bawk.